Germanııanyń Meklenbýrg federaldyq jerinde Qazaqstannyń Qurmetti konsýldyǵy ashyldy
ASTANA. KAZINFORM — Meklenbýrg — Aldyńǵy Pomeranııa federaldyq jeriniń eń iri qalasy Rostokta Qazaqstan Respýblıkasynyń Qurmetti konsýldyǵynyń saltanatty ashylý rásimi ótti, dep habarlaıdy SІM baspasóz qyzmeti.
Іs-sharaǵa Meklenbýrg Aldyńǵy Pomeranııa federaldyq jeriniń ekonomıka, ınfraqurylym, týrızm jáne eńbek jónindegi stats-hatshysy Iohen Shýlte, Іshki ister jáne qurylys mınıstrliginiń stats-hatshysy Ina-Marıa Ýlbrıh, Batys Pomeranııa men Shyǵys Meklenbýrg boıynsha parlamenttik stats-hatshy Haıko Mıras, Rostok qalasynyń ober-býrgomıstri Eva-Marııa Kreger, sondaı-aq jergilikti saıası, iskerlik jáne qoǵamdyq toptardyń ókilderi men buqaralyq aqparat quraldary qatysty.
Qazaqstan Respýblıkasynyń Germanııa Federatıvtik Respýblıkasyndaǵy elshisi Nurlan Onjanov eki el arasyndaǵy strategııalyq áriptestiktiń joǵary deńgeıin atap ótip, óńiraralyq ózara is-qımyl men iskerlik baılanystardyń artyp kele jatqan róline nazar aýdardy. Ol Qurmetti konsýldyqtyń ashylýy ekonomıkalyq, ınvestıtsııalyq, gýmanıtarlyq jáne óńiraralyq baılanystardy ilgeriletýdiń tıimdi quralyna aınalatynyna, sondaı-aq óńirde qazaqstandyq bıznestiń qatysýyn keńeıtýge yqpal etetinine senim bildirdi.
Stats-hatshy I.Shýlte Rostokta Qurmetti konsýldyqtyń ashylýy german-qazaqstan qatynastaryn odan ári nyǵaıtýdyń mańyzdy kezeńi ekenin atap ótti. Onyń aıtýynsha, bul qadam eki el arasyndaǵy áriptestiktiń ornyqty damýyn kórsetip, óńiraralyq yntymaqtastyqty tereńdetýge jáne iskerlik baılanystardy keńeıtýge múmkindik beredi.
Іs-shara barysynda Rostok qalasyndaǵy Qazaqstan Respýblıkasynyń Qurmetti konsýly Iohann Kıllıngerge konsýldyq patent tabystaldy. Iohann Kıllınger «Buss Group GmbH» kompanııasynyń basqarýshy seriktesi bolyp tabylady, sondaı-aq 2013 jyldan beri Gambýrg federaldyq jerindegi Qazaqstan Respýblıkasynyń Qurmetti konsýly qyzmetin atqaryp keledi. Ol óńirlik deńgeıde qazaqstan-german gýmanıtarlyq, ekonomıkalyq jáne mádenı baılanystardy nyǵaıtýǵa eleýli úles qosty.
Bul taǵaıyndaý I.Kıllıngerdiń konsýldyq okrýgin Meklenbýrg — Aldyńǵy Pomeranııa, Gambýrg jáne Shlezvıg-Golshteın federaldyq jerlerin qamtı otyryp keńeıtý aıasynda júzege asyryldy. Qurmetti konsýldyń qyzmeti (konsýldyq is-áreketter júrgizilmeıdi) Meklenbýrg — Aldyńǵy Pomeranııa, Gambýrg jáne Shlezvıg-Golshteın federaldyq jerlerine taralatyn bolady.
Іs-shara qonaqtary Qurmetti konsýldyqtyń bıznes, ǵylym jáne mádenıet ókilderi arasyndaǵy dıalog úshin mańyzdy alańǵa aınalatynyna, sondaı-aq Qazaqstan men Germanııa halyqtary arasyndaǵy ózara túsinistikti nyǵaıtýǵa yqpal etetinine senim bildirdi.
Saltanatty rásimniń sońynda qatysýshylar beıresmı túrde pikir almasyp, onyń barysynda odan ári yntymaqtastyqtyń perspektıvalary talqylanyp, óńirlik deńgeıde áriptestik baılanystardy damytý boıynsha naqty qadamdar aıqyndaldy.
Osyǵan deıin Baıan-Ólgeıde Qazaqstan konsýldyǵy ashylatynyn jazǵanbyz.
