Germanııanyń medıtsınasy daǵdarys aldynda: dáriger joq, stýdent kóp, oryn az

ASTANA. KAZINFORM — Qazir elde shamamen 5 myń jalpy praktıka dárigeriniń orny bos tur, ásirese aýyldyq jerlerde jaǵdaı óte qıyn. Aldaǵy jyldary jaǵdaı odan ári nasharlaýy múmkin, sebebi árbir tórtinshi nemis dárigeri – 60 jastan asqan. Bul – 100 myńnan astam maman. Zeınetke shyqqan dárigerdiń ornyn basatyn mamandy daıarlaý úshin birneshe jyl qajet, dep jazdy DW.

Bul jerde taǵy bir másele bar – medıtsınalyq joǵary oqý oryndarynda oryndar jetkiliksiz. 2024/25 oqý jylynyń qysqy semestrinde nemis ýnıversıtetteri 1-kýrsqa shamamen 10 myń stýdent qabyldaǵan, al shamamen 20 myń úmitker oqýǵa túse almaı qalǵan. Bul tek talaptardyń joǵary bolýyna baılanysty emes, sonymen qatar oryn tapshylyǵynan da.

Sarapshylardyń pikirinshe, máseleni sheshý úshin kem degende 5 myń qosymsha oqý orny qajet. Alaıda olardyń sanyn kóbeıtý qıyn bolýy múmkin – oqý uzaq ári qymbat. Federaldyq statıstıka basqarmasynyń málimetinshe, bir stýdenttiń oqýyna ketetin jyldyq shyǵyn 25 myń eýrodan asady. Osy máseleni sheshý úshin Brandenbýrgte jýyrda Laýzıts medıtsınalyq ýnıversıteti quryldy, ol 2026 jyly jumysyn bastaýy tıis.

Máseleni tolyq sheshpese de, azdap jeńildetetin faktor – medıtsınalyq bilimi bar bosqyndardyń kelýi. Mysaly, Sırııadan kelgen shamamen 6 myń adam Germanııanyń aýrýhanalarynda dáriger bolyp jumys istep júr. Welt deregi boıynsha, Reseıdiń Ýkraınaǵa basyp kirýinen keıin Germanııaǵa 1600-deı ýkraınalyq medıtsına qyzmetkeri kelgen, olardyń 187-si óz biliktiligin rastap, jumys isteýge ruqsat alǵan. Sońǵy 10 jylda Germanııadaǵy sheteldik dárigerlerdiń jalpy sany eki ese ósti jáne 2023 jyly 64 myńǵa jýyqtady.

Eske sala keteıik, buǵan deıin Germanııada antıbıotıkterdi durys qoldanbaǵandyqtan ondaǵan myń adam kóz jumǵanyn jazǵan edik.