Germanııanyń Mangeım qalasynda bir top adamdy kólik basyp ketti
ASTANA. KAZINFORM — Jergilikti jýrnalıster oqıǵa ornynda brezentpen jabylǵan kem degende bir adamnyń denesi baıqalǵanyn aıtady, dep habarlaıdy Kazinform agenttiginiń menshikti tilshisi.
Kóliktiń soqtyǵysýy saldarynan kem degende bir adam qaıtys boldy. Taǵy 25-i jaraqat aldy, olardyń 15-iniń jaǵdaıy aýyr, deıdi jergilikti BAQ. Reuters agenttigi kýágerlerge silteme jasaı otyryp, oqys oqıǵa bolǵan jerde birneshe adam jatqanyn habarlady. Sol sátte zardap shekken eki adamǵa reanımatsııalyq sharalar júrgizilip jatqany da aıtyldy.
Sonymen qatar, polıtsııa qala ortalyǵynda aýqymdy operatsııa júrgizip jatqany belgili boldy. Quqyq qorǵaý organdarynyń málimetinshe, oqys oqıǵa karnaval sherýi ótip jatqan qalanyń ortalyq alańynda bolǵan. Polıtsııa qala turǵyndaryn Mangeım ortalyǵynan aýlaq bolýǵa jáne úılerinen shyqpaýǵa shaqyrady. Sebebi atalmysh jaǵdaı «ómirge qaýip tóndiretin» dep baǵalanady.
Bul rette polıtsııa ókili «tergeý jedel qarqynmen júrgizilip jatqanyn» habarlady. Alaıda, aqparat jarııa etilgen kezde yqtımal qylmyskerge qatysty qandaı da bir derekter aıtylmady.
Degenmen Bild málimeti boıynsha kólik júrgizýshisi ustaldy. Baden-Vıýrtemberg ishki ister mınıstri DPA-ǵa bergen suhbatynda kúdikti Reınland-Pfalts týmasy, 40 jastaǵy nemis azamaty ekenin naqtylaǵan.
Degenmen, kúdikti ustalsa da, qala ortalyǵyndaǵy barlyq jol jabyldy. Ortalyqtan tys barlyq jol men kópirlerde avtomat asynǵan polıtseıler qujat tekserýge kiristi. Basylym usynǵan aqparatqa sáıkes Mangeıme aspanynda tikushaqtar qalaǵa sholý jasap júr.
Mangeım Baden-Vıýrtemberg federaldy shtatynyń soltústiginde Gessen jáne Reınland-Pfalts shekarasynda ornalasqan. Qalada shamamen 320 myń adam turady — bul Baden-Vıýrtembergtegi ekinshi úlken qala.
Eske salsaq, sońǵy aptalarda Germanııada osyǵan uqsas birneshe shabýyl boldy. 2024 jyldyń jeltoqsanynda Magdebýrgte Saýd Arabııasynyń týmasy, 50 jastaǵy psıhıatr Rojdestvolyq bazar qonaqtaryn kólikpen basyp ótip, saldarynan alty adam qaıtys boldy. Aqpan aıynyń ortasynda 24 jastaǵy aýǵan bosqyny óz kóligimen Mıýnhendegi demonstranttar tobyn qaǵyp ketti. Oqıǵa ornynda jas áıel men bala til tartpaı ketti.