Germanııanyń Qazaqstan ekonomıkasyna ınvestıtsııasy 28,5 paıyzǵa ósti
ASTANA. KAZINFORM - Qazaqstan Respýblıkasy Ónerkásip jáne qurylys mınıstri Ersaıyn Naǵaspaev Germanııa Federaldyq Respýblıkasynyń Ekonomıka jáne energetıka federaldyq mınıstrliginiń parlamenttik memlekettik hatshysy Shtefan Rýnhoffpen kezdesip, ınvestıtsııalar, ónerkásiptik kooperatsııa jáne tehnologııalar salalaryndaǵy yntymaqtastyq perspektıvalaryn talqylady.
Taraptar Qazaqstan men Germanııa arasyndaǵy saýda-ekonomıkalyq yntymaqtastyqtyń joǵary qarqynmen damyp kele jatqanyn atap ótti. Ótken jyly Germanııadan Qazaqstan ekonomıkasyna baǵyttalǵan tikeleı ınvestıtsııalar kólemi 28,5 paıyzǵa ósti. Keıingi 20 jyl ishinde tikeleı sheteldik ınvestıtsııalardyń jalpy kólemi $7,8 mlrd-tan asty. Onyń shamamen 90 paıyzy óńdeý ónerkásibine baǵyttalǵan.
-Germanııadan tartylatyn ınvestıtsııalar biz úshin strategııalyq mańyzǵa ıe jáne olar Qazaqstan Respýblıkasynyń Prezıdenti Qasym-Jomart Kemeluly Toqaevtyń qoldaýyna ıe. Eki memleket basshylarynyń turaqty saparlary men joǵary deńgeıdegi belsendi baılanystary dostyq jáne áriptestik qatynastardyń damýyna eleýli serpin berdi. Biz ózara baılanystarymyzdy jan-jaqty damytýǵa jáne ınvestorlarǵa qajetti qoldaý kórsetýge daıynbyz, – dep atap ótti Ersaıyn Naǵaspaev.
Germanııa Federaldyq Respýblıkasynyń Ekonomıka jáne energetıka federaldyq mınıstrliginiń parlamenttik memlekettik hatshysy Shtefan Rýnhoff nemis bıznesiniń qazaqstandyq seriktestermen ónerkásiptik yntymaqtastyqty damytýǵa joǵary deńgeıde qyzyǵýshylyq tanytyp otyrǵanyn jetkizdi.
Qazaqstan men Germanııa arasyndaǵy ónerkásiptik kooperatsııa portfeli 7 myń jumys ornyn qurýdy kózdeıtin 41 ınvestıtsııalyq jobany qamtıdy, onyń 20-sy qazirdiń ózinde iske qosylǵan. Olardyń qatarynda Heidelberg Materials kompanııasynyń tsement óndiristeri, Knauf kompanııasynyń qurylys materıaldaryn lokalızatsııalaý, CLAAS aýyl sharýashylyǵy tehnıkasyn jáne Siemens AG elektrotehnıkalyq ónimderin shyǵarý jobalary bar. Qazirgi ýaqytta kalıı tyńaıtqyshtaryn, lıtıı jáne basqa da ónimderdi óndirý boıynsha birlesken jobalar iske asyrylý satysynda tur.
Kezdesýge qatysýshylar jerde sırek kezdesetin jáne strategııalyq mańyzdy materıaldardy birlesip ıgerý men óńdeý, óndiristerdi lokalızatsııalaý jáne jańa ındýstrııalyq jobalardy iske qosý baǵyttaryndaǵy áleýetti atap ótti.
Kezdesý qorytyndysy boıynsha taraptar eki memleket arasyndaǵy saýda-ekonomıkalyq yntymaqtastyqty odan ári tereńdetýge ýaǵdalasty.
Osyǵan deıin Qazaqstan men Germanııa kompanııalary arasynda yntymaqtastyq týraly memorandýmdarǵa qol qoıylǵany týraly habarladyq.
