Germanııanyń eń úlken áýejaıyn tyshqan elektr qýatynsyz qaldyrdy
ASTANA. KAZINFORM – Germanııanyń Frankfýrt qalasyndaǵy eń úlken áýejaıy kemirgishtiń kesirinen keshe túnde jartylaı elektr qýatynsyz qaldy. Bul týraly Spiegel habarlady.
Oqıǵa 5 tamyz kúni keshke bolǵan. Elektr qýatynyń úzilýinen áýejaıdyń 1-termınalynyń aýmaqtary zaqymdanǵan. Bul sektordy negizinen Lufthansa áýe kompanııasy paıdalanady.
Elektr qýatynyń úzilýinen bólek, termınal aýmaǵy jartylaı tútinge orandy. Áýejaı ókili tótenshe rezervtik qýat birden iske qosylǵanyn, sondyqtan jolaýshylarǵa qaýip tónbegenin málimdedi.
Tańerteń elektr qýaty jelisi qalpyna keltirildi. Alaıda, joljúkti suryptaý júıesindegi aqaýǵa baılanysty Discover Airlines jáne Lufthansa avıakompanııalarynyń ushý kestesi sál ózgerdi.
Áýejaıda apatqa kemirgish tyshqan sebep bolǵany habarlandy – ol úzilgen kabeldiń janynan óli kúıinde tabyldy.
