Germanııanyń burynǵy qarjy mınıstri Facebook-tegi alaıaqtardyń qurbany boldy
ASTANA. KAZINFORM — Germanııada alaıaqtar Shlezvıg-Golshteın jeriniń burynǵy qarjy mınıstri Raıner Vıgardtyń Facebook-tegi akkaýntyn buzyp kirgen, dep habarlaıdy BILD.
Qaskóıler akkaýnttyń ataýyn «Snow Highmountains» dep ózgertip, saıasatkerdiń sýretiniń ornyna áıel adamnyń fotosyn qoıǵan. Keıin olar Vıgardtyń atynan qoldanýshylarǵa habarlama jibere bastaǵan.
Onyń dostarynyń qatarynda Shlezvıg-Golshteın jeriniń premer-mınıstri Danıel Gıýnterdi qosa alǵanda, belgili saıasatkerler bolǵandyqtan, jalǵan akkaýnt kópshilikke senimdi kóringen.
Alaıaqtar keń taralǵan «romantıkalyq alaıaqtyq» (love scam) tásilin qoldanǵan. Bul ádiste qaskóıler ózin romantıkalyq qarym-qatynas ornatqysy keletin adam retinde tanystyryp, jábirlenýshiniń senimine kirgen soń, shuǵyl máseleni syltaýratyp aqsha suraıdy.
Shlezvıg-Golshteın polıtsııasy tanymal adamdar men uıymdardyń akkaýnttary alaıaqtar úshin erekshe tartymdy nysana ekenin eskertti.
Raıner Vıgardtyń aıtýynsha, ol Facebook jelisin kópten beri paıdalanbaǵan jáne akkaýntynyń buzylǵanyn tek BILD basylymynyń saýalynan keıin ǵana bilgen. Osydan keıin ol polıtsııaǵa aryz túsirdi.
Eske salaıyq, Qaraǵandy oblysynda egde jastaǵy azamattardy aldap, olardyń aqshasyn ıemdengen alaıaq 4 jyl, 7 aı merzimge bas bostandyǵynan aıyryldy. Ózin jábirlenýshilerdiń shetelde turatyn týystary retinde tanystyryp, túrli syltaýmen aqsha alǵan kúdikti 10 zeınetkerge shyǵyn keltirgen.
