Germanııanyń batysynda bolǵan jarylysqa zańsyz pırotehnıka sebep bolýy múmkin
ASTANA. KAZINFORM – Germanııanyń Soltústik Reın–Vestfalııa jerindegi Bohým qalasynda kópqabatty turǵyn úıdiń birinshi qabatyndaǵy páterde jarylys boldy, dep habarlaıdy BILD.
Polıtsııa málimetinshe, oqıǵa 31 jeltoqsanǵa qaraǵan túni bolǵan. Sol sátte páter ishinde 48 jastaǵy áıel men onyń 46 jastaǵy tanysy bolǵan. Ekeýi de zardap shekpegen, alaıda ýaqytsha ustalǵan.
BILD dereginshe, jarylystyń sebebi qoldan jasalǵan petardalar bolýy múmkin.
Kórshi páterde turatyn 70 jastaǵy áıelge jedel medıtsınalyq kómek qajet bolǵan. Ony oqıǵa ornynda reanımatsııalaýǵa tyrysqanymen, keıin aýrýhanaǵa jetkizilgen. Dárigerlerdiń barlyq kúsh-jigerine qaramastan, zeınetker kóz jumdy.
Qazirgi ýaqytta polıtsııa onyń ólimi men jarylystyń arasynda tikeleı baılanys bar-joǵyn anyqtap jatyr.
Soqqy tolqynynyń kúshti bolǵany sonshalyq, jarylys bolǵan páterdiń terezesi bekitpelerinen julynyp, kóshege qulaǵan. Polıtsııanyń resmı nusqasyna sáıkes, jarylystyń naqty sebebi ázirge anyqtalǵan joq.
Osy oraıda Eýropa elderinde pırotehnıkalyq buıymdardyń qaýiptiligi týraly másele kóterilip jatyr. Máselen, Nıderland parlamenti 2026 jyldan bastap petardalar men otshashýlarǵa tyıym salý týraly sheshim qabyldady.