Germanııanyń arnaıy qyzmetterine kıbershabýyl jasaýǵa jáne turǵyn úılerge jasyryn kirýge ruqsat berildi
ASTANA. KAZINFORM – Germanııa Býndestagy 13 qarashada arnaıy qyzmetterdi reformalaý týraly zań qabyldady. Qujatqa sáıkes, Federaldyq barlaý qyzmetine (BND) kıbershabýyl jasaýǵa, al Konstıtýtsııany qorǵaý jónindegi federaldyq vedomstvoǵa (BfV) belgili bir jaǵdaılarda turǵyn úılerge jasyryn kirýge ruqsat beriledi. Bul týraly Kazinform agenttigi DW basylymyna silteme jasap habarlaıdy.
Zańdy 308 depýtat qoldasa, 190 depýtat qarsy daýys bergen. Taǵy 71 depýtat qalys qaldy.
Die Welt basylymynyń jazýynsha, reforma tyńshylyqqa, terrorızmge jáne dıversııalarǵa qarsy kúreske baǵyttalǵan. Buǵan deıin Germanııanyń arnaıy qyzmetteri negizinen aqparat jınaýmen aınalyssa, endi olarǵa belsendi operatsııalar júrgizýge múmkindik beriledi.
Atap aıtqanda, BND sheteldegi aqparattyq júıelerge shabýyl jasap, derekterdi joıýǵa nemese aýystyrýǵa, sondaı-aq ınternet-trafıkti basqa baǵytqa burýǵa quqyly bolady. Sonymen qatar arnaıy qyzmetterge bıometrııalyq derekterdi taldaý úshin jasandy ıntellektini paıdalanýǵa ruqsat etiledi. Erekshe jaǵdaılarda olar 16 jastan asqan jasóspirimderdi de qupııa aqparat berýshi retinde yntymaqtastyqqa tarta alady.
Arnaıy qyzmetterdiń josparlanǵan áreketteriniń zańdylyǵyn aldyn ala burynǵy sýdıalar kiretin arnaıy qadaǵalaý organy baǵalaıdy.
Germanııanyń ishki ister mınıstri Aleksander Dobrındt barlaý qurylymdary tolyqqandy arnaıy operatsııalar júrgizý múmkindigine ıe bolatynyn málimdedi.
-Barlaý qyzmetteri tolyqqandy arnaıy qyzmetterge aınalyp jatyr. Bul sharalar elge syrttan da, ishten de qaýip tóndiretin demokratııa jaýlarymen kúresý úshin qajet, – dedi ol.
Germanııa bıligi reformanyń qajettiligin Reseı, Qytaı jáne Iran tarapynan týyndap otyrǵan gıbrıdti qaýipterdiń kúsheıýimen túsindiredi. Al zańǵa qarsy taraptar arnaıy qyzmetterge beriletin jańa ókilettikter azamattardyń quqyqtary men bostandyqtaryna qaýip tóndirýi múmkin ekenin eskertedi.
Osyǵan deıin Germanııa men Ulybrıtanııanyń 2 myń shaqyrymnan astam qashyqtyqqa ushatyn gıperdybystyq qarý ázirlegeli jatqany týraly jazdyq.