Germanııany fýtboldan álem chempıony qylǵan bapker Ózbekstanda jumys isteýi múmkin
ASTANA. KAZINFORM — Fýtboldan Germanııa quramasynyń eks-bapkeri Ioahım Lev Ózbekstan fýtbol qaýymdastyǵymen kelissózder júrgizip jatyr.
Bul týraly Sport24 basylymy óz aqparat kózderine silteme jasap habarlady.
65 jastaǵy mamannyń kandıdatýrasy bas bapker retinde emes, keńesshi retinde talqylanyp jatqany habarlandy.
— Taraptar arasynda baılanys bar, Lev yntymaqtastyqqa ashyq. Biraq ony bas bapker etip taǵaıyndaý týraly áli áńgime joq. Ózbekstan oǵan ulttyq quramanyń álem chempıonatyna daıyndyǵyn qadaǵalaıtyn keńesshi qyzmetin usyndy, — dedi mamanǵa jaqyn derekkóz.
Degenmen Ózbekstan fýtbol qaýymdastyǵynda birtutas ustanym joq.
— Keıbir sheneýnik komandaǵa álem chempıonatyna belgili maman kerek dep eseptep, Levti bas bapkerlikke shaqyrǵysy keledi. Degenmen, federatsııanyń taǵy bir bóligi Temýr Kapadzeniń qalýyn jaqtaıdy: ulttyq quramany álem chempıonatyna shyǵarǵan sol edi. Kapadzeniń ózi kómekshi bolǵysy kelmeıdi, eger Lev bas bapker bolyp taǵaıyndalsa, komandadan ketýi múmkin, — deıdi ekinshi derekkóz.
Derekkózdiń aıtýynsha, taraptar arasynda konsýltatsııalar jalǵasýda: Levtiń Ózbekstan quramasyndaǵy róliniń formaty talqylanyp jatyr.
Ózbekstan fýbol qaýymdastyǵy habarlarǵa nemese Ioahım Levpen kelissózder júrgizip jatqanyna qatysty túsinikteme bergen joq.
Ioahım Lev 2006 jyly Germanııa quramasynyń bas bapkeri bolyp taǵaıyndalsa, 2014 jyly álem chempıony atandy. Ol 2021 jyly Germanııa quramasynan ketip, sodan beri jumyssyz.
Ózbekstan ulttyq quramasy 2026 jylǵy álem chempıonatynyń irikteý kezeńin slovenııalyq bapker Srechko Katanetstiń qol astynda bastady. Alaıda ol 2025 jyldyń qańtarynda densaýlyǵyna baılanysty qyzmetinen ketken. Onyń ornyna kelgen ózbekstandyq Temýr Kapadze slovenııalyq mamannyń jumysyn sátti jalǵastyryp, ulttyq qurama sapynda álem chempıonatyna joldama aldy.
2026 jylǵy álem chempıonaty 11 maýsym men 19 shilde aralyǵynda AQSh, Kanada jáne Meksıkada ótedi.
Eske sala keteıik, ózbekstandyq fýtbolshy Hýsanovtyń Anglııada qansha jalaqy alatyny belgili boldy.