Germanııamen ótetin match Qazaqstan úshin asa mańyzdy – ıAroslava Shvedova
NUR-SULTAN. QazAqparat – Qazaqstan áıelder quramasy 15-16 sáýirde elordada komandalyq álem chempıonaty – Bıllı Djın Kıng kýbogynyń irikteý kezeńinde Germanııamen sheshýshi kezdesýin ótkizedi. Qazaqstandyqtar jeńiske jetken jaǵdaıda alǵash ret atalmysh týrnırdiń fınaldyq kezeńine joldama alatyn bolady. Osyǵan oraı Qazaqstan quramasynyń kapıtany ıAroslava Shvedova QazAqparat tilshisine suhbat berdi.
-ıAroslava, Qazaqstan quramasynyń aldaǵy matchqa daıyndyǵy qashan bastalady?
-Biz elordada match bastalardan bir apta buryn jınalamyz ba dep josparlap otyrmyz. Ulttyq tennıs ortalyǵynda topyraq tósenishi jasaldy, onda bári daıyn. Biz sol kortta jattyǵyp, sheberligimizdi ushtaı túsetin bolamyz.
-Kezdesýge eki aptadan sál astam ýaqyt qalǵan eken. Komandanyń qazirgi babyn qalaı baǵalar edińiz?
-Jaqsy dep aıtýǵa bolady. Juptyq synda Aýstralııa ashyq chempıonatynyń fınalyna deıin jetken Anna Danılınanyń tabystary qýantady. Jyldy sátti bastaǵan Elena Rybakınanyń sodan keıin densaýlyǵy syr bergenimen, qazir tolyq qalpyna keldi. ıÝlııa Pýtıntseva jýyrda AQSh-ta ótken masters týrnırlerinde ózin kórsete bildi. Alda topyraq tósenishinde jarystar ótetin bolady. Onyń mundaı tósenishinde tamasha oınaıtynyn eskersek, tabys ta keler dep oılaımyz. Zarınanyń azdap jaraqaty boldy, qalpyna kelý ústinde. Ol birneshe dodadan tys qalǵanymen, jýyrda komandaǵa qosylady.
-Qysqasy, tolyq quramda deısiz ǵoı?
-Iá, barlyq qyzdar reıtıngi men sporttyq nátıjelerine qaraı iriktelip alyndy. Elena Rybakına, ıÝlııa Pýtıntseva, Zarına Dııas, Anna Danılınaǵa qosymsha Jibek Qulambaeva besinshi oıynshy bolmaq. Quramaǵa alǵash ret shaqyrtý alǵan Jibek – bizdiń bolashaǵymyz. Biz onyń negizgi tennısshiler qataryna qosylýyn qalaımyz.
-Al Germanııa quramasy týraly ne aıtar edińiz?
-Germanııa – atalǵan jarysta turaqty óner kórsetip kele jatqan tájirıbeli komanda, 2014 jylǵy dodanyń fınalısi. «Úlken dýlyǵa» týrnıriniń úsh dúrkin chempıony Anjelıka Kerberdiń bir ózi nege turady. Qarsylastarymyzdyń osal tustaryn dóp basyp, paıdalanýǵa tyrysamyz. Jerebe alǵash ret óz elimizde oınaýǵa múmkindik berdi. Sony múlt jibermeýimiz qajet. Naýryz aıynyń basynda Qazaqstan erler quramasy Devıs kýbogynyń irikteý kezeńinde Osloda Norvegııany utyp, fınalǵa joldama aldy. Jigitterdiń osy tabysy bizdi de jigerlendirip, sáttilikke bastaıdy dep oılaımyz. Jankúıerlerimiz de qoldaıdy dep úmittenemiz.
-Ózińiz qazirgi Germanııa quramasynyń qaı múshelerimen oınadyńyz?
-Andrea Petkovıchpen jas kezimizde jolymyz toqaılasty. Frankfýrttaǵy jarysta teń oıyn boldy, kezdesý sońynda ol aıaǵyn aýyrtyp alyp, matchty jalǵastyra almady. Anjelıka Kerbermen eki ret oınadym, esep – 1:1. Laýra Zıgemýnd ta ońaı shaǵylatyn jańǵaq emes.
-Biz tuńǵysh ret óz alańymyzda irikteý matchyn ótkizemiz. Utsaq, fınaldyq kezeńge shyǵamyz. Jaýapkershilik júgi jeńil emes shyǵar?
-Árıne, jaýapkershilikti sezinemiz, fınalǵa shyǵý úshin bar kúshimizdi salamyz. Buǵan deıin de birneshe múmkindigimiz bolǵanymen, ony paıdalana almadyq. Keıde sáttilik jetispedi. Mysaly, Kanadamen matchta olardyń quramy onsha myqty bolǵan joq. Biraq óz korttarynda oınaǵannan keıin bizdi utyp ketti. Endi biz de jigerlene bilsek, tabystyń aýyly alys bolmas dep oılaımyn.
-Negizgi quramnan basqa jastardyń da kapıtanysyz. Bir mezgilde eki quramaǵa basshylyq etý qıyn emes pe?
-Bul bizdiń bolashaǵymyz úshin kerek. Jastarmen maýsymaralyq jıyn ótkizdim. Kelesheginen úlken úmit kúttiretin qyzdar bar eken. Olarǵa psıhologııalyq turǵydan kómek berip, jańa tabystarǵa jetelegim keledi. Óıtkeni el quramasynyń keleshektegi músheleri solar ǵoı, olar myqty tennısshi retinde qalyptassa, biz de osal bolmaımyz.
-Áńgimeńizge rahmet. Germanııamen matchta qazaqstandyq qyzdarǵa tek sáttilik tileımiz.
