Germanııamen áýe qatynasyn toqtatarlyq sebep joq – Eljan Birtanov

NUR-SULTAN. QazAqparat – Densaýlyq saqtaý mınıstri Eljan Birtanov Qazaqstan men Germanııa arasyndaǵy áýe qatynasyn toqtatý máselesine qatysty pikir bildirdi, dep habarlaıdy QazAqparat tilshisi.

«Keshe aıtylǵandaı, vedomstvoaralyq komıssııanyń sheshimimen reısterdiń sanyn shekteý boıynsha sharalar qabyldanǵan edi. Sebebi jolaýshylardyń tasymalyn shekteý mańyzdy. Infektsııa neǵurlym kóp bolsa soǵurlym jolaýshylar aǵynyn azaıtamyz. Tolyǵymen japqymyz kelmeıdi (Germanııamen). Óıtkeni negizinen ushyp kelip jatqan – bizdiń azamattar. Demalys kezeńi, bıznes saparlar men issaparlar bar. Sol úshin áýe qatynasyn toqtatarlyq sebep joq», - dedi Eljan Birtanov OKQ-da ótken baspasóz máslıhatynda.

Sondaı-aq. Densaýlyq saqtaý mınıstri Qazaqstannyń eki azamatynan koronavırýs ınfektsııasy tabylǵanyn málim etti.

Eske sala ketsek, 11 naýryzy men 24 sáýiri aralyǵynda Lufthansa nemis áýe kompanııasy Qazaqstanǵa reısterdi ýaqytsha toqtatty. Kompanııa Frankfýrt-Almaty-Frankfýrt (aptasyna 4 ret) jáne Frankfýrt-Almaty-Nur-Sultan (aptasyna 3 ret) baǵyttary boıynsha turaqty reısterdi oryndap kelgen.