Germanııalyq saıasatker QR Prezıdentiniń Joldaýy týraly aıtty

BERLIN. QazAqparat - Germanııa ekonomıkasy Shyǵys komıtetiniń basqarýshy dırektory Mıhael Harms Prezıdent Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna joldaýyna pikir bildirdi, dep habarlaıdy «QazAqparat» HAA-nyń menshikti tilshisi.

«Qazaqstan Respýblıkasy Prezıdentiniń halyqqa Joldaýy álemdik naryqtaǵy qazirgi tańdaǵy syn-tegeýrinder men basymdyq berilýi tıis baǵyttardy, sondaı-aq osy syn-tegeýrinderdi sheshý jolynda Qazaqstan qoldanýy múmkin naqty sharalar men strategııany kórsetedi», - deıdi Harms.

Onyń aıtýynsha, paıdaly qazbalarǵa baı eldiń joǵary tehnologııalary men tsıfrlandyrý salasyna kóńil bólýi bolashaǵy zor strategııalyq josparlarynan derek beredi.

Sarapshynyń sózine qaraǵanda, GFR kásiporyndary Qazaqstannyń ekonomıkalyq damý strategııasyn sátti júzege asyrýǵa úles qosýy múmkin. Atap aıtqanda, Qazaqstandaǵy 4.0 ındýstrııasyn qurý jáne tsıfrlandyrý, aýyl sharýashylyǵy, kólik, logıstıka salalary Germanııa kásipkerleriniń nazaryn aýdarady.

«EKSPO-2017» kórmesinen keıin qaıta qalpyna keletin energııa kózderi salasynda yntymaqtastyq ornatýdyń erekshe múmkindikteri týdy», - deıdi Mıhael Harms.

Germanııalyq sarapshy Memleket basshysynyń Joldaýynda aıtylǵan bıýrokratııany qysqartý, jemqorlyqqa qarsy kúres, kásibı bilim berý, qarsy sektory sııaqty salalardy damytýǵa basa nazar aýdarǵanyn tilge tıek etti.