Germanııalyq oqýshylar tájirıbe almasý úshin Qazaqstanǵa keldi
PAVLODAR. QazAqparat - Pavlodar qalasyndaǵy hımııa-bıologııa baǵytyndaǵy Nazarbaev Zııatkerlik mektebine Germanııa eliniń Vetslar qalasynan 15 oqýshy jáne eki ustazdan quralǵan delegatsııa keldi, dep habarlaıdy QazAqparat pavlodarnews.kz saıtyna silteme jasap.
Nazarbaev Zııatkerlik mektebiniń baspasóz qyzmetinen málim etkendeı, Goethe Schule Wetzlar mektebinen kelgen delegatsııa 5-17 sáýir aralyǵynda qazaq elimen etene tanysyp, oqýshylarmen úzdik halyqaralyq tájirıbe almasýdy maqsat etip otyr.
«Barlyǵymyz Qazaqstanǵa alǵashqy ret kelip otyrmyz. Alǵan áserimiz óte keremet. Mektepke kire berisinen bizdi oqýshylar, ustazdar óte jyly qarsy aldy. Óte qýanyshtymyz. Aldaǵy aptalarda qala ómirimen, osy jerdiń mádenıetimen tanysatyn bolamyz», - deıdi delegatsııany bastap kelgen Goethe Schule Wetzlar mektebiniń shet el tilderi ustazy Helena Kramer.
«Seriktes mektepter» baǵdarlamasy aıasynda júzege asyrylyp otyrǵan bul shara eki el arasyndaǵy ózara mádenı yntymaqtastyqty nyǵaıtýǵa baǵyttalǵan. Árbir delegat pavlodarlyq otbasylarda ornyǵyp, qazaqstandyq joldastarynyń ómir saltymen tanyspaq. Osý ýaqytta meımandar oblystyń kórikti jerlerin aralap, Nur-Sultan qalasyna sapar shegýdi josparlap otyr.
«Men Gete gımnazııasynan kelip otyrmyn. Meni erekshe qyzyqtyrǵany, mektepte bıologııa, hımııa, fızıka jáne matematıka syndy pánder aǵylshyn tilinde ótkiziletini. Ózim de fızıka jáne matematıka pániniń ustazy bolǵandyqtan, aldaǵy kúnderi ózara tájirıbemizben almasyp, yntymaqtastyǵymyzdy odan ári órbitemiz dep oılaımyn», - deıdi Shlım Patrık.
Aıta keterligi, 2018 jyldyń ekinshi jartysynda mekteptiń 15 oqýshysy Gete-ınstıtýty uıymdastyrǵan baıqaýdyń jeńimpazy atanyp, «Träume von Deutschland» oqýshylar almasý baǵdarlamasy aıasynda Germanııaǵa eki aptalyq saparǵa baryp kelgen bolatyn.
