Germanııalyq kompanııa Jambyl oblysynda quny 810 mlrd teńge bolatyn kombınat salyp jatyr
Jobany «KAZAKH INVEST» UK» AQ qoldaýymen «Monterra Group AG» (QuestaCapital GmbH) german kompanııasy júzege asyrady. Qurylystyń saltanatty ashylý rásimine GFR-diń Qazaqstandaǵy Tótenshe jáne Ókiletti Elshisi Tıllo Klınner, Indýstrııa jáne ınfraqurylymdyq damý mınıstri Beıbit Atamqulov, Syrtqy ister mınıstriniń orynbasary Almas Aıdarov, Jambyl oblysynyń ákimi Berdibek Saparbaev, «Monterra Group AG» Basqarma tóraǵasy Krıstıan Graf Fon Strahvıtts, sondaı-aq «KAZAKH INVEST» UK» AQ servıstik qoldaý departamenti dırektorynyń orynbasary Marat Esenov qatysty.
Jobada 5 mln tonnaǵa deıin ken óndirý men óńdeý josparlanǵan. Jobany iske asyrý 3 kezeńen turady. Investıtsııanyń jalpy kólemi 810 mlrd teńgeni quraıdy. Paıdalanýǵa berilgennen keıin kombınatta 2800-den astam adam jumyspen qamtylady. Jobany iske asyrý merzimi 2049 jylǵa deıin eseptelgen.
«Búginde «Monterra Qazaqstan» kompanııasynyń baǵaly metaldardy óńdeý jáne altyn ken oryndaryn ıgerý boıynsha iri ónerkásiptik nysanynyń negizi qalandy. Biz bul joba óńirdiń ál-aýqatyn jaqsartýǵa mýltıplıkatıvti áser beredi - jergilikti halyqty jumyspen qamtyp, aralas salalardy damytýǵa yqpal etedi dep senemiz», - dep atap ótti Almas Aıdarov.
Investorlardyń aıtýynsha, kásiporyn Dore qorytpasynda altyn óndirýdi josparlap otyr. 1 kezekti júzege asyrý aıasynda –jylyna 1 tonnaǵa deıin. Ekinshi kezeńdi júzege asyrý jylyna 5 tonnaǵa deıin óndirýge múmkindik beredi. 3-kezeńde «Monterra Group» kompanııasy jyl saıyn 10 tonnaǵa deıin altyn shyǵarýdy josparlap otyr.
Aıta ketý kerek, qoldanystaǵy zańnamaǵa sáıkes osy qymbat metaldy elden shetelge shyǵarýǵa tyıym salynǵan.
«Barlyq jumystar ekologııanyń barlyq talaptaryn, zamanaýı tehnologııalardy qoldanýdy, qaýipsizdik tehnıkasy erejeleri men normalaryn eskere otyryp, joǵary deńgeıde júrgizilýde. «Monterra Group» jumysyndaǵy negizgi basymdyq – bul turaqty damý, sondyqtan qorshaǵan ortany qorǵaý jónindegi barlyq mindetter halyqaralyq jáne eýropalyq standarttarǵa sáıkes iske asyrylady. Biz ekologııany qorǵaýǵa barynsha jaýapkershilikpen qaraımyz jáne geologııalyq barlaý jumystaryn júrgizý kezeńinde Qazaqstan men Germanııanyń mamandandyrylǵan uıymdaryn tarta otyryp, únemi ekologııalyq monıtorıng júrgizemiz», - dep málimdedi Krıstıan Graf Fon Strahvıtts.
Qaratas-Maıbulaq alańy ýchaskelerindegi ken oryndarynda óndirý jerasty taý-ken qazbalaryna ótetin ashyq karerde júzege asyrylatyn bolady. Óndiriletin kenderde kómirtekti materıaldyń, kúshán men polımetaldardyń kóp bolýyna baılanysty jobada Eýropada qoldanylatyn alynǵan kontsentrattardy óńdeýdiń zamanaýı tehnologııalary (Albion Process) qoldanylady.
«Óz tarapynan KAZAKH INVEST osy iri jobany iske asyrýda jan-jaqty qoldaý kórsetýge daıyn. Germanııalyq bıznesmender ınvestıtsııalyq kelisimshart jasasýdy josparlap otyr, onyń aıasynda birqatar jeńildikter men preferentsııalar alady. Bul joba baǵaly metaldardy qaıta óńdeý salasyndaǵy óńirdiń áleýetin baǵyn ashýǵa kómektesedi, jergilikti halyqtyń ál-aýqatyn jaqsartady jáne Qazaqstan men Germanııa arasyndaǵy iskerlik jáne dostyq baılanystardy nyǵaıtýǵa qosymsha serpin beredi», - dep habarlady «KAZAKH INVEST» UK» AQ servıstik qoldaý departamenti dırektorynyń orynbasary Marat Esenov.
Aıta keteıik, «Monterra Group AG» kompanııasy 2020 jyly Jambyl oblysynyń ekonomıkasyna 2,3 mlrd teńgeden astam ınvestıtsııa saldy. Bıyl ınvestorlar shamamen 7 mlrd teńge salýdy josparlap otyr.
