Germanııalyq dáriger sırek aýrýlardy emdeý tájirıbesimen bólisti
ASTANA. QazAqparat - Pedıatrııa jáne balalar hırýrgııasy ǵylymı ortalyǵynda «Mýkopolısaharıdozǵa shaldyqqan naýqastardyń menedjmenti» atty sheberlik sabaǵy ótti, dep habarlaıdy QazAqparat atalǵan ortalyqtyń baspasóz qyzmetine silteme jasap.
Negizgi dáristi Germanııadan kelgen Sırek aýrýlar ortalyǵynyń bilikti dárigeri, medıtsına ǵylymdarynyń doktory Krıstına Lampe ótkizip, qazaqstandyq áriptesterimen sırek aýrýlardy, onyń ishinde mýkopolısaharıdozdy emdeý boıynsha tájirıbesimen bólisti.
Sondaı-aq sheberlik sabaqta mýkopolısaharıdoz aýrýy kezinde tynys alý músheleriniń, júıke jáne qımyl-tirek júıeleriniń zaqymdanýy, medıkamentozdy túzetý múmkindigi, olardyń hırýrgııalyq emdeýge kórsetilimi, sırek aýrýǵa shaldyqqan patsıentterge anestezıologııalyq járdem kezindegi qıyndyqtar jáne olardan arylýdyń joldary týraly máseleler jan-jaqty talqylandy. Ásirese, ferment almastyratyn preparattardan bolýy múmkin reaktsııalarǵa jáne olardy joıý men aldyn alý boıynsha emdeý terapııasyna úlken mańyz berildi. Trenıngte sonymen qatar, túrli kúrdeli klınıkalyq jaǵdaılar usynyla otyryp, qaraldy.
Eki kún boıy ótken sheberlik synypta Germanııadan kelgen bilikti dáriger Krıstına Lampe elimizdiń ár óńirinen kelgen 10-nan astam sırek aýrýlarǵa shaldyqqan balalardy qabyldap, keńes berdi.
«Mýkopolısaharıdozǵa shaldyqqan naýqastardyń qazaqstandyq qory sheteldik dárigerden keńester alyp, qaralý úshin sharaǵa sırek aýrýǵa shaldyqqan balalardyń ata-analaryn arnaıy shaqyrdy. Olar elimizdiń ár túrli oblys, qalalarynan kelip otyr. Sırek aýrýǵa shaldyqqan balalarǵa naqty dıagnoz Germanııa men Reseıde ǵana arnaıy zertteý arqyly qoıylady. Bul sharany uıymdastyrýdaǵy basty maqsatymyz - ata-analarǵa kómek berý, sheteldik mamanǵa qaralýǵa jaǵdaı jasaý, psıhologııalyq qoldaý kórsetý», - deıdi Mýkopolısaharıdozǵa shaldyqqan naýqastardyń qaıyrymdylyq qorynyń dırektory Rýslan Sarmýrzakov.
Mýkopolısaharıdoz boıynsha respýblıkalyq úılestirýshi, Almatydaǵy Pedıatrııa ortalyǵynyń dárigeri Maıra Sharıpovanyń aıtýynsha, ortalyqta bilimi men biliktiligin kóterý, bul aýrýlardy erte anyqtaý men emdeý boıynsha mamandar arasynda túrli sabaqtar men sheberlik synyptar ótkizilip turady. Sonymen birge nasıhattaý jumystary da júrgiziledi.
«Sırek aýrýlary bar naýqastardy barynsha erte kezeńde anyqtaý úlken mańyzǵa ıe. Óıtkeni, onyń belgileri basqa túrli aýrýlardyń belgileri sııaqty bolýy múmkin. Sırek aýrýlardy qaraý boıynsha bizde arnaıy zertteýler de júrgiziledi. Dıagnostıkalaý jolǵa qoıylyp keledi. 2009 jylǵa deıin orfandyq dárilerde tirkeý bolmaǵandyqtan, qoljetimdi bolmaǵan edi. Qazir bul másele sheshimin taýyp, óte qymbat turatyn preparattar memleket tarapynan tegin qamtamasyz etiledi. Bul dertti emdeý men dıagnostıkalaý boıynsha arnaıy 2017-2019 jyldarǵa arnalǵan Jol kartasy jasaldy, normatıvti-quqyqtyq qujattar bekitildi. Reseı, Germanııa syndy elderdiń bilikti mamandarymen baılanys ornatyp, túrli semınar, dóńgelek ústelder ótkizýdemiz. Elimizdiń ár oblysynda sırek aýralar boıynsha aımaqtyq úılestirýshiler taǵaıyndaldy», - deıdi ol.
Aıta keteıik, mýkopolısaharıdoz - sırek kezdesetin, tuqym qýalaıtyn gendik aýrý.
