Germanııalyqtardyń 81%-y qoǵamdyq-saıası jańalyqtardy turaqty baqylap otyrady

ASTANA. KAZINFORM – Germanııada jańalyqqa qyzyǵýshylyq tanytatyndardyń úlesi zerttelgen elder arasynda eń joǵary bolyp shyqty. El turǵyndarynyń úshten biri kún saıyn 10-ǵa deıin maqala oqıdy. Nemister úshin ózekti oqıǵalar sport pen oıyn-saýyq taqyryptarynan da mańyzdy., dep jazady DW.

Jańalyqtar nemister úshin áli de basty aqparat kózderiniń biri bolyp qala beredi. Al sapaly jańalyq kontentiniń janynda jarnama ornalastyrý brendter úshin qaýipsiz. Mundaı qorytyndyǵa halyqaralyq marketıng agenttigi Stagwell júrgizgen «Germanııadaǵy jańalyqtardyń bolashaǵy» atty zertteý nátıjeleri negiz boldy. Saýalnamaǵa Germanııanyń shamamen 11 myń eresek turǵyny qatysty.

Zertteý derekterine sáıkes, nemisterdiń 81 paıyzy eldegi jáne álemdegi ózekti oqıǵalardy turaqty túrde qadaǵalap otyrady. Respondentterdiń 35 paıyzy jańalyqtar taspasyn táýligine orta eseppen jeti ret qarap, kúnine shamamen 10 maqala oqıdy. Jańalyqtarǵa qyzyǵýshylyq sporttyq jáne oıyn-saýyq materıaldarynan da joǵary: sportqa 25 paıyz, oıyn-saýyq taqyryptaryna 15 paıyz ǵana turaqty nazar aýdarady.

Sonymen qatar, nemisterdiń 18 paıyzy el men álemdegi oqıǵalar týraly aqparatty belsendi ári júıeli túrde oqıdy. Bul kórsetkish AQSh pen Kanadada – 11 paıyz, Ulybrıtanııada – 10 paıyz, al Azııa-Tynyq muhıty aımaǵynda – 9 paıyz. Sarapshylar muny Germanııa qoǵamynyń aqparattyq keńistikke tereń tartylǵanymen jáne jýrnalıstıkaǵa degen joǵary qurmetimen baılanystyrady.

Zertteý jańalyqtardy tutyný erekshelikterimen qatar, jańalyq ortasyndaǵy jarnamanyń qabyldanýyn da taldady. Nátıjelerge sáıkes, tipti saıası nemese qylmystyq mazmundaǵy materıaldardyń janynda ornalastyrylǵan bannerler men beınerolıkter brend bedeline nuqsan keltirmeıdi jáne satyp alý nıetin tómendetpeıdi.

Saýalnamaǵa qatysqandardyń 66 paıyzy saıası nemese qylmystyq jańalyqtar janyndaǵy jarnamany kórgennen keıin ónim satyp alýǵa daıyn ekenin bildirgen. Al oıyn-saýyq jáne sport taqyryptary aıasyndaǵy jarnama boıynsha bul kórsetkish 67 paıyzdy quraǵan. Ártúrli jas toptary men áleýmettik sanattar arasynda, sonyń ishinde zýmerler men mıllenıaldar, joǵary tabysty azamattar men joǵary oqý ornyn bitirgender arasynda aıtarlyqtaı aıyrmashylyq baıqalmaǵan.

Zertteý qorytyndysy qarapaıym: nemister jańalyqtardy jıi oqıdy, jarnama bul ortada tıimdi jumys isteıdi, sondyqtan ony jańalyq kontentiniń janynda ornalastyrýdan bas tartýdyń qajeti joq.

Germanııadaǵy Axel Springer baspasynyń kommertsııalyq jáne marketıng jónindegi dırektory Krıstof Ek-Shmıdttiń aıtýynsha, jańalyq medıasyndaǵy jarnama sporttyq nemese oıyn-saýyq segmentindegi jarnamamen birdeı deńgeıde áser beredi. Onyń pikirinshe, jańalyq ortasynan bas tartqan brendter aýdıtorııa úshin «kózge kórinbeıtin» bolyp qalýy múmkin.

Germanııada iri brendter áli de dástúrli medıany – teledıdardy, gazetter men jýrnaldardy basym baǵyt retinde saqtap otyr. Statista platformasynyń derekterine sáıkes, 2025 jyly jarnama naryǵynda azyq-túlik bólshek saýdasy kósh bastaǵan. Odan keıin korporatıvtik kompanııalar men onlaın-qyzmetter ornalasqan.

Sandyq jarnama ósip kele jatqanymen, dástúrli medıa jappaı aýdıtorııany qamtýdyń mańyzdy arnasy bolyp qala beredi. Bul segmentte teledıdar aldyńǵy orynda tur. Odan keıin senimdilik pen turaqtylyq usynatyn baspasóz quraldary keledi. Jekelegen kompanııalar arasynda Germanııadaǵy eń iri jarnama berýshi – amerıkalyq Procter & Gamble kompanııasy. Odan keıin Keln qalasynda ornalasqan Rewe sýpermarketter jelisi tur.

Germanııadaǵy jańalyqtardyń mańyzdylyǵyn halyqaralyq zertteýler de rastaıdy. Reuters Institute Digital News Report esebine sáıkes, Germanııadaǵy eresek onlaın-aýdıtorııanyń 45 paıyzy jańalyqtardyń basym bóligine senedi. Ásirese qoǵamdyq-quqyqtyq teleradıo habar taratý arnalary men jergilikti, óńirlik gazetter joǵary senimge ıe.

Jastar arasynda áleýmettik jelilerdiń róli artyp keledi. Eresekterdiń shamamen 33 paıyzy Facebook, X nemese YouTube platformalarynda jańalyqtardy qadaǵalasa, 18-24 jas aralyǵyndaǵy jastar arasynda bul kórsetkish 50 paıyzǵa jetedi. Al jańalyq izdeý úshin chat-bottardy turaqty paıdalanatyndar nebári 4 paıyzdy quraıdy.

Sonymen qatar zertteý eresek ınternet paıdalanýshylardyń 71 paıyzy keıde jańalyqtardy ádeıi qaramaýǵa tyrysatynyn kórsetken. Negizgi sebep – teris aqparattyń emotsıonaldyq kúızeliske ákelýi.

Aıta keteıik, Italııada tolyǵymen jasandy ıntellekt arqyly jazylǵan alǵashqy gazet jaryqqa shyqty.