Germanııalyq sarapshy Qazaqstannyń sý salasyndaǵy tsıfrlyq jobasyna joǵary baǵa berdi
ASTANA. KAZINFORM — Germanııanyń Halyqaralyq yntymaqtastyq jónindegi qoǵamy (GIZ) baǵdarlamalarynyń jetekshisi Karolına Mılov Qazaqstanda Sý resýrstarynyń ulttyq aqparattyq júıesin (SRUAJ) ázirleý baǵytynda atqarylyp jatqan jumystardy joǵary baǵalady.
Astanada Sý resýrstary aqparattyq-taldaý ortalyǵynyń Sıtýatsııalyq ortalyǵynyń ashylýynda ortalyq mamandary júıeniń múmkindikterin tanystyrdy. Beıneqabyrǵada sý nysandarynyń tsıfrlyq kartasy jáne Shardara sý qoımasynyń úsh ólshemdi modeli kórsetildi. Onda sý kólemi men deńgeıi, sý aǵyny, sý jiberý kórsetkishteri jáne sý qoımasynyń tolý dınamıkasy týraly málimetter qamtylǵan.
— Bizdiń qoldaýymyzdyń naqty nátıjesin kórip otyrǵanymyzǵa qýanyshtymyz. Áriptesterimiz usynylǵan resýrstardy tıimdi paıdalanyp, olardy basqa uıymdardyń bastamalarymen ushtastyryp, bastapqyda josparlanǵan nátıjeden de joǵary jetistikterge qol jetkizip otyr. Ásirese sý resýrstaryn basqarý salasynda eńbek etip júrgen mamandardyń kásibıligi men áleýetin erekshe atap ótkim keledi, — dedi Karolına Mılov.
Sonymen qatar sarapshy Sý resýrstary jáne ırrıgatsııa mınıstrliginiń mektepterde depýtattar men elshilerdiń qatysýymen sý únemdeý taqyrybynda ekologııalyq sabaqtar ótkizý bastamasyn qoldady. Ekologııalyq sabaqtarǵa 3,3 mıllıonnan astam oqýshy men 35 myń stýdent qatysty.
— Bir-birimizden úırenip, basqa elderdiń tájirıbesimen tanysý mańyzdy. Shaqyrylǵan spıkerler bólisetin naqty mysaldar sabaqtardyń mazmunyn baıytyp, oqýshylar úshin qyzyqty ári tanymdy ete túsedi, — dedi Karolına Mılov.
Osyǵan deıin Qazaqstanda sý resýrstaryn qorǵaýǵa volonterler tartylatynyn jazdyq.