Germanııalyq kompanııa Qarmet-pen jańa bastamalardy júzege asyrýy múmkin
ASTANA. KAZINFORM – Memleket basshysy D.A.R. Metall AG basqarma tóraǵasy Krıstıan Artnerdi qabyldady, dep habarlaıdy Aqorda.
Qasym-Jomart Toqaev D.A.R. Metall AG kompanııasymen seriktestikti damytý jáne zamanaýı nemis tehnologııalaryn ıgerý elimizdiń ónerkásip jáne ekologııa salasyndaǵy basymdyqtaryna tolyq saı keletinin atap ótti.
Osyǵan oraı kezdesý barysynda Qazaqstanda metall óńdeý jobasyn birlese iske asyrý perspektıvasyna aıryqsha mán berildi.
Memleket basshysy Qazaqstan úshin metallýrgııa sektory asa mańyzdy ekenine nazar aýdaryp, salanyń mańdaıaldy kásiporny – Qarmet kompanııasynda júrgizilip jatqan rekonstrýktsııa barysyn baıandady.
Óz kezeginde Krıstıan Artner nemis kompanııasynyń Qazaqstanda óndiris jobalaryn jalǵastyrýǵa nıetti ekenin rastady.
D.A.R. Metall AG Alataý qalasynda turmystyq jáne ónerkásip qaldyqtaryn qaıta óńdeýge, sondaı-aq Qarmet kompanııasymen jańa bastamalardy birlese júzege asyrýǵa qyzyǵýshylyq tanytyp otyr.
Aıta keteıik, Germanııanyń Wilo kompanııasy Qazaqstandy OA naryǵyna shyǵatyn alań retinde paıdalanbaq.
