Germanııaǵa jumys isteýge baratyn ózbekstandyqtar úshin vıza berý tártibi jeńildemek
TAShKENT. KAZINFORM – Ózbekstan men Germanııa ózbekstandyqtardyń nemis kompanııalaryna jumysqa ornalasýyn jeńildetýge baǵyttalǵan birqatar kelisimge qol qoıdy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ózbekstannyń Jumyspen qamtý jáne kedeılikti tómendetý mınıstri Behzod Mýsaev Samarqanda Germanııanyń Іshki ister mınıstri Nensı Fezermen kezdesý ótkizdi.
«Kóshi-qon máselesi boıynsha birqatar jeńildikter ázirlenip jatyr. Biz ózbekstandyqtardy nemis kompanııalaryna jumysqa ornalastyrý protsesin jeńildetýge daıynbyz», - dep málim etti Nensı Fezer kezdesý barysynda.
Sonymen qatar, vedomstvo basshylary medıtsına mamandary men kólik salasynyń qyzmetkerlerin daıarlaý úshin jańa baǵdarlama ázirleýge ýaǵdalasty.