Germanııaǵa surapyl daýyl jaqyndap qaldy

NUR-SULTAN. QazAqparat – Germanııanyń soltústigine «Ilenııa» daýyly jaqyndap qaldy, elde joǵary daıyndyq rejımi saqtalýda, dep habarlaıdy QazAqparat Deutsche Welle saıtyna silteme jasap.

Nemis meteorologııalyq qyzmetiniń (DWD) derekterine saı, Germanııanyń soltústigindegi Garts taýynyń shyńynda saǵatyna 152 kılometr jel tirkeldi.

DWD Soltústik Reın-Vestfalııa jáne Meklenbýrg-Aldyńǵy Pomeranııada qatty jel týraly eskertý jasady. Onymen qosa, Shvartsvald sııaqty Ońtústik Germanııanyń taýly aýdandarynda da aýa raıynyń nasharlaıtyny habarlandy.

Meteorologııalyq qyzmettiń boljamyna saı, Soltústik Reın-Vestfalııadaǵy Zaýerland pen Gartsta jaýyn-shashyn tolassyz jaýmaq. Bılik oryndary Berlın men Gambýrg sııaqty iri qalalarda saıabaqtar men ormandarǵa barýdan bas tartýǵa shaqyrdy. El boıynsha órt sóndirý qyzmetteri apat bolǵan jaǵdaıda jumysqa kirýge ázir.

«Daýyl Germanııanyń soltústik-batysynan bastalyp, ońtústik-shyǵysyna qaraı eldiń ortalyǵyna deıin jyljıdy», - dep túsindirdi DWD meteorology Adrıan Lızer.

Germanııanyń Deutsche Bahn temirjol qyzmeti Twitter-de aýa raıynyń nasharlaýy saldarynan poıyzdardyń keshigip jatqanyn habarlady.

Lufthansa áýe kompanııasy da óz saıtynda ushaqtardyń keshigýi týraly habarlap, jolaýshylardy sapar aldynda reıs kestesin qadaǵalaýdy shaqyrdy.

Germanııanyń halqy kóp Soltústik Reın-Vestfalııa jerinde mektepter jabyldy. Tómengi Saksonııada da sabaq bolmaıdy.