Germanııaǵa kóshken nemis qaıratkeri: Qazaqstannan keterde jýsan julyp áketemiz

NUR-SULTAN. QazAqparat - Germanııadaǵy qoǵamdyq-saıası qaıratker Gaýks Valter Qazaqstannyń nemisterine, olardyń tili men mádenıetine qoldaý bildirgen el halqyna, Elbasy Nursultan Nazarbaevqa alǵys bildirdi, dep habarlaıdy QazAqparat tilshisi.

Gaýks Valter 15 jasynda Qazaqstannan kóship ketken. Qazirgi ýaqytta Germanııaǵa kóship kelip jatqan nemisterdiń jastar uıymyn basqarady.

«23 jyl buryn men Qońyrat aýylynan Germanııaǵa kóship kettim. Búgin Qazaqstanǵa qaıta kelý baqyty buıyryp otyr. Qazaqstan meniń Otanym bolyp qala bermek. Búgin Eýropanyń mıllıondaǵan nemisteriniń atynan Nursultan Ábishuly Sizge alǵys aıtqym keledi. 800 myńnan astam nemis óziniń tarıhı Otanyna oraldy, týǵan-týystaryn tapty. Siz Alǵys kúnin belgilegen kezde biz de «Qazaq halqyna myń alǵys» dedik. Bizdi Germanııada qazaqstandyq nemister dep aıtady. Al Qazaqstanda 180 myńnan astam nemis Qazaqstan halqynyń bir bóligine aınaldy. Biz nemisterdiń tilderin, mádenıetin qoldaǵandaryńyzǵa rahmet aıtamyz», - deıdi nemis qaıratkeri Qazaqstan halqy Assambleıasynyń XXVII sessııasynda.

Gaýks Valter óz sózinde «Otannan alys bolsaq ta Qazaqstandaǵy jańalyqtarǵa qulaǵymyz túrik» dedi.

«Siz Nursultan Ábishuly, Qazaqstan prezıdenttigin tapsyra otyryp, bıliktiń qaqtyǵyssyz beıbit jolmen ótýin qamtamasyz ettińiz. 30 jyldyń ishinde Qazaqstan jetken progresske qýanyshtymyz. Sizdiń atyńyz - álemde, Germanııada orasan zor abyroıǵa ıe. Biz - Qazaqstannyń nemisteri tehnologııa, bıznes, dýaldy bilim berýde tyǵyz jumys istep júrmiz. Biz taqyryptyq semınarlardy Qazaqstanda da, Germanııada da ótkizip júrmiz. Siz Nursultan Ábishuly osyndaı seriktestikke jol ashyp berdińiz», - deıdi ol.

Gaýks Valter óz sózinde Qazaqstannyń osynaý strategııalyq baǵytty jalǵastyra beretinine senim bildirdi.

«Bizdiń nemister Germanııada qazaq dalasy týraly estilikterdi umytpaıdy. Nemisterdiń bári Qazaqstan halqy qandaı jaqsylyq jasaǵanyn biledi. Qazaqstandy súıedi. Kóbi osynda kelip, jýsan julyp alyp ketedi. Jýsan ıisi - bizdiń esimizge dalany túsiredi. Qazy men et - bizdiń áli kúnge deıingi súıikti asymyz. Al qymyz Germanııada da óndirilip jatyr. Qazaqstan halqyna baqyt pen gúldený jolyn tileımiz», - deıdi Gaýks Valter.

Eske sala ketsek, elordada QR Tuńǵysh Prezıdenti - Elbasy, Qazaqstan halqy Assambleıasynyń Tóraǵasy Nursultan Nazarbaevtyń tóraǵalyǵymen Qazaqstan halqy Assambleıasynyń XXVII sessııasy ótip jatyr.