Germanııaǵa qazaqstandyq munaıdy jetkizý kólemi artady
ASTANA. KAZINFORM — QR Energetıka mınıstri Erlan Aqkenjenov Bavarııanyń (GFR) halyqaralyq yntymaqtastyq pen Eýropa máseleleri jónindegi mınıstri Erık Baısvengermen kezdesti.
Vedomstvo baspasóz qyzmetiniń málimetinshe, kelissóz barysynda taraptar Qazaqstan men Bavarııa arasyndaǵy energetıka salasyndaǵy yntymaqtastyqty keńeıtý máselelerin talqylady. Ásirese, qazaqstandyq munaı jetkizilimderin damytýǵa erekshe nazar aýdaryldy.
Erlan Aqkenjenov Qazaqstan men Germanııa arasyndaǵy ózara is-qımyldyń júıeli ári kópsalaly sıpatqa ıe ekenin atap ótti. Yntymaqtastyq dástúrli energetıka, munaı óńdeý, mashına jasaý, jańartylatyn energııa kózderi jáne «jasyl sýtegi» baǵyttaryn qamtıdy.
— Kezdesý barysynda Germanııadaǵy Shvedt munaı óńdeý zaýytyna otandyq munaıdy jetkizý jaıy talqylandy. Mınıstrdiń aıtýynsha, buryn jasalǵan kelisimder nátıjesinde «Drýjba» munaı qubyry arqyly tasymal kólemi turaqty túrde ósip keledi. 2023 jyly kórsetkish 1 mln tonnadan assa, 2025 jyly 2,1 mln tonnaǵa jetken. 2026 jyly bul kólemdi 2,5 mln tonnaǵa deıin arttyrý josparlanyp otyr, — delingen habarlamada.
Indýstrııalyq yntymaqtastyq aıasynda Siemens Energy kompanııasynyń Qazaqstannyń energetıkalyq ınfraqurylymyn jańǵyrtýdaǵy róli nazarǵa alyndy. Qazirgi ýaqytta Almaty JEO-2-ni rekonstrýktsııalaý jobasy iske asyrylyp, gaz týrbınalyq jabdyqtar jetkizilip, montajdalyp jatyr. Sonymen qatar, qazaqstandyq mamandardy oqytý jumystary júrgizilip jatyr. Osyndaı yntymaqtastyq Túrkistan bý-gaz qondyrǵysyn salý jobasynda da jalǵasady.
Seriktestiktiń mańyzdy baǵyty — jańartylatyn energııa kózderin damytý. Nemistiń Goldbeck Solar GmbH jáne Solarnet Investment GmbH kompanııalary Qaraǵandy oblysynda jalpy qýaty 176 MVt bolatyn kún elektr stansalaryn salyp jatyr.
Mańǵystaý oblysyndaǵy HYRASIA ONE jobasy strategııalyq mánge ıe. Joba «jasyl sýtegi» men ammıak óndirisin qamtıdy. Oǵan qýaty 40 GVt-qa deıin jel jáne kún elektr stantsııalary men 20 GVt-qa deıingi elektrolızer kesheni kiredi. Bolashaqta jylyna 2 mln tonnaǵa deıin sýtegi óndirý múmkindigi qarastyrylǵan.
Kezdesý qorytyndysynda taraptar áriptestikti odan ári damytýǵa múddeli ekenin jetkizdi. Sondaı-aq ekijaqty energetıkalyq yntymaqtastyqtyń turaqty damyp kele jatqany jáne onyń jahandyq energetıkalyq kóshý men ornyqty damý maqsattaryna saı ekeni atap ótildi.
Osyǵan deıin Energetıka vıtse-mınıstri Suńǵat Esimhanov Kaspıı qubyr konsortsıýmyna drondar shabýylynan keıin qazaqstandyq munaı tasymaly qalaı júrip jatqanyn aıtyp berdi.