Germanııadan tórt oıynshy Qazaqstan jastar quramasyna shaqyryldy
ASTANA. QazAqparat - Germanııa chempıonatynyń tórt fýtbolshysy Qazaqstan jastar quramasyna shaqyrtý aldy. Bul týraly Qazaqstannyń fýtbol federatsııasynyń baspasóz qyzmetinen habarlandy.
Aıta keterligi, elimizdiń quramasynda oınaýǵa nıet bildirgen tórt oıynshynyń da túpki tamyrynda Qazaqstanmen baılanysy bar bolyp shyqty.
«Qazaqstan jastar quramasynyń ortalyq alańynda olqy tustar bar. Qazirgi ýaqytta biz komandany kúsheıtý joldaryn qarastyryp jatyrmyz. Dýbl jáne birinshi lıga komandalarymen qatar, burynǵy qazaqstandyqtar sanalatyn jáne sheteldik chempıonatta oınaıtyn qazaqstandyq fýtbolshylardy baqylaýda ustap kelemiz. Osyǵan oraı, aldaǵy oqý-jattyǵý jıynyna Germanııadan tórt fýtbolshy shaqyryldy. Olardyń arǵy tegi qazaqstandyq, sondyqtan fýtbolshylar tarıhı Otanynda oınaýǵa nıet bildirip otyr. Biz olardy qarap shyǵamyz. Eger Qazaqstan jastar quramasyn kúsheıte alatyn bolsa, onda olar ári qaraı komandaǵa tolyǵymen shaqyrtý alatyn bolady», - deıdi Qazaqstan jastar quramasynyń aǵa jattyqtyrýshysy Saýlıýs Shırmıalıs.
Eske sala keteıik, 23-31 naýryz aralyǵynda Qazaqstan jastar quramasy Estonııada oqý-jattyǵý jıynyn ótkizedi.
