Germanııadan kelgen dáriger taldyqorǵandyqqa tegin ota jasady

TALDYQORǴAN. KAZINFORM — Taldyqorǵanda alǵash ret zamanaýı ádispen júrekke ota jasaldy. Jetisýlyq mamandar Germanııadan kelgen professormen birlesip jasaǵan otanyń sátti ótkenin málimdedi.

Qarasha aıynyń basynda Jetisýda arıtmııaǵa (júrek yrǵaǵynyń buzylýy) shaldyqqan Taldyqorǵan qalasynyń turǵyny ortalyqqa júgingen. Tekserý barysynda naýqastan mıtraldik klapannyń 3-4 dárejedegi jetispeýshiligi, júrek yrǵaǵynyń buzylysy, júrekshe fıbırllıatsııasy anyqtalǵan. Keıin oǵan krıoablıatsııa ádisimen ota jasalyp, júregine mıtraldy qaqpaqsha protezi ornatylǵan.

Kardıolog dárigerlerdiń aıtýynsha, joǵary tehnologııalyq bul ádis júrektiń belgili bir aımaqtaryn joǵary temperatýrada muzdatý arqyly emdeıdi, bul dástúrli tásilderge qaraǵanda asqyný qaýpin tómendetedi jáne naýqastyń qalypty ómir saltyna oralýyn jyldamdatady eken.

«Mundaı ota bizde buryn-sońdy bolmaǵan. Jańa tehnologııalar qoldaný arqyly krıoabılıatsııa dep jatyrmyz ol júrek yrǵaǵyn salqyndatý arqyly úlken mınýstyq temperatýralarda -60, -65 gradýsqa deıin salqyndatyp, júrektiń ótkizgishtigin bir qalypqa keltirý. Otany Germanııanyń Gambýrg qalasynan kelgen professor Hankemen oblystyq kardıoortalyqtyń dırektory Nursan Seıituly birigip jasady», — deıdi kardıolog Dáýren Álibekov

Ádistiń basty artyqshylyǵy júrek yrǵaǵynyń buzylýyn qaýipsiz ári tıimdi qalpyna keltirý. Aıta keteıik quny 3 mln teńgeden asatyn mundaı kúrdeli ota mindetti áleýmettik saqtandyrýy bar adamdar úshin tegin jasalady.

Eske salaıyq osyǵan deıin Taldyqorǵanda tuńǵysh ret jiti leıkoz qaterli isigine shaldyqqan naýqastyń jazylyp shyqqanyn jazǵanbyz.