Germanııadan kelgen atyraýlyq stýdentten koronavırýs tabylǵan joq
ATYRAÝ. QazAqparat – Germanııadan kelgen atyraýlyq stýdentten koronavırýs ınfektsııasynyń belgisi tabylǵan joq, dep habarlaıdy QazAqparat.
Bul týraly Inder aýdandyq ortalyq aýrýhanasynyń bas dárigeri Baýyrjan Tólegen habarlady.
«Áleýmettik jelide «Inderbor kentindegi aýrýhanada koronavırýspen aýyrǵan naýqas emdelýde» degen jalǵan aqparat tarady. Bizde karantınde Germanııadan kelgen stýdent jatyr. Ol Eýropadaǵy ahýaldyń qıyndaýyna baılanysty elge oralǵan. Onyń otbasynda 85 jastaǵy ájesi men áke-sheshesi, qaryndasy bar. Olar úsh bólmeli úıde turady. Sol sebepten, stýdentke Inder aýdandyq ortalyq aýrýhanasynda karantınge jatý usynyldy. Qazir ol jeke blokqa ornalastyryldy. Densaýlyǵy jaqsy, qyzýy da, shaǵymy da joq. Analız qorytyndysy teris nátıje kórsetti. Stýdent karantınde 29 naýryzǵa deıin bolady», - dedi Inder aýdandyq ortalyq aýrýhanasynyń bas dárigeri Baýyrjan Tólegen.
