Germanııadan Qazaqstanǵa quny 6 mlrd teńge 5 myń asyl tuqymdy mal ákelinbek
ASTANA. KAZINFORM — Jyl sońyna deıin Germanııadan jalpy quny shamamen 6 mlrd teńge bolatyn 5 myń bas golshtın-frız tuqymdy iri qara ákelý josparlanǵan.
Aýyl sharýashylyǵy vıtse-mınıstri Talasbek Qanafın Germanııanyń Aýyl sharýashylyǵy federaldyq mınıstrliginiń parlamenttik memlekettik hatshysy Martına Englhardt-Kopfpen kezdesti. Kezdesýde eki eldiń saýda baılanystaryn keńeıtý, birlesken jobalardy júzege asyrý jáne agroónerkásip salasyndaǵy áriptestikti tereńdetý máseleleri sóz boldy.
Talasbek Qanafın Qazaqstannyń Germanııamen agrarlyq saladaǵy baılanysty damytýǵa múddeli ekenin atap ótti.
Germanııa aýyl sharýashylyǵyn jańǵyrtý, zamanaýı tehnologııalardy engizý, ósimdik suryptary men mal tuqymdaryn asyldandyrý, sondaı-aq óndiristiń turaqtylyǵyn qamtamasyz etý baǵyttarynda mol tájirıbe jınaqtaǵan.
— Eki el arasyndaǵy aýyl sharýashylyǵy ónimderiniń saýdasy da artyp keledi. 2025 jyly agroónerkásip ónimderiniń ózara saýda kólemi 23%-ǵa ósti. Osy kezeńde Qazaqstannyń aýyl sharýashylyǵy ónimderiniń eksporty 38%-ǵa artty. Al 2026 jyldyń qańtar–tamyz aılarynda eki el arasyndaǵy taýar aınalymy ótken jyldyń sáıkes kezeńimen salystyrǵanda 11,6%-ǵa kóbeıdi, — delingen AShM habarlamasynda.
Martına Englhardt-Kopf eki el arasyndaǵy baılanysty odan ári nyǵaıtýdyń, sala mamandarynyń tájirıbe almasýynyń jáne agrarlyq baǵyttardaǵy birlesken jumysty jandandyrýdyń mańyzyn atap ótti.
Sútti mal sharýashylyǵy — yntymaqtastyqtyń mańyzdy baǵyttarynyń biri. KFM jobasy aıasynda 400-den astam maman arnaıy oqýdan ótip, kásibı biliktiligin arttyrdy. Sonymen qatar sút óndirýshilerge keńes berip, oqytý jumystaryn júrgizetin ortalyq ashyldy.
Ortalyq Azııa elderinde turaqty eginshilik tásilderin damytýǵa arnalǵan óńirlik ortalyq qurý jumystary da jalǵasyp jatyr. Jańa ortalyqtyń maqsaty — aımaq elderiniń tájirıbe almasýyna jaǵdaı jasaý, ozyq ádisterdi keńinen taratý jáne jergilikti tabıǵı-klımattyq jaǵdaılarǵa beıimdelgen zamanaýı tehnologııalardy engizýge qoldaý kórsetý.
— Qazaqstan men Germanııa arasyndaǵy óndiristik baılanystyń taǵy bir naqty nátıjesi — CLAAS kompanııasynyń aýyl sharýashylyǵy tehnıkasyn Qazaqstanda shyǵarýy. Joba bastalǵaly beri jalpy quny shamamen 270 mlrd teńge bolatyn 2,1 myńǵa jýyq tehnıka óndirildi. Bul otandyq mashına jasaý salasynyń damýyna serpin berip, sharýalardyń zamanaýı tehnıkaǵa qol jetkizýine múmkindik týǵyzady.
Aldaǵy ýaqytta asyl tuqymdy mal ósirý, tuqym sharýashylyǵy, selektsııa jáne organıkalyq aýyl sharýashylyǵy salalaryndaǵy baılanysty keńeıtý kózdelip otyr. Jyl sońyna deıin Germanııadan jalpy quny shamamen 6 mlrd teńge bolatyn 5 myń bas golshtın-frız tuqymdy iri qara ákelý josparlanǵan, — delingen habarlamada.
Tuqym sharýashylyǵynda da germandyq tehnologııalarǵa suranys artyp keledi. Qazaqstandyq sharýashylyqtar men ǵylymı mekemeler Germanııanyń PETKUS kompanııasymen birlesip, tuqymdyq materıaldy daıyndaýǵa arnalǵan 15 tehnıka satyp aldy. Satyp alynǵan jabdyqtardyń jalpy quny — 2,9 mlrd teńge. Jańa tehnıka tuqymdy óńdeý men daıyndaý sapasyn jaqsartýǵa, sondaı-aq osy baǵyttaǵy jumystardyń tıimdiligin arttyrýǵa múmkindik beredi.
Kezdesý sońynda taraptar buǵan deıin qol jetkizilgen ýaǵdalastyqtardy iske asyrýdy jalǵastyrýǵa, sala mamandarynyń tájirıbe almasýyn jandandyrýǵa jáne agroónerkásiptiń basym baǵyttarynda jańa birlesken jobalardy qolǵa alýǵa kelisti.
Eki el aldaǵy ýaqytta aýyl sharýashylyǵyna ozyq tehnologııalardy engizýge, óndiris tıimdiligin arttyrýǵa jáne uzaq merzimdi yntymaqtastyqty nyǵaıtýǵa kúsh salmaq.
Aıta ketelik Aqmola oblysyna Germanııadan 165 bas golshtın sıyry ákelindi.
