Germanııadan asa iri kólemde esirtki saýdalap, izdeý jarııalanǵan adam ekstradıtsııalandy

ASTANA. QazAqparat - 2023 jylǵy 13 shilde. Germanııa Federatıvtik Respýblıkasynyń Úkimeti asa iri kólemde esirtkini zańsyz saqtaǵany jáne ótkizgeni úshin izdeýde júrgen azamatty ekstradıtsııalaý týraly Qazaqstan Respýblıkasy Bas prokýratýrasynyń ótinishin qanaǵattandyrdy.

QR Bas prokýratýrasynyń baspasóz qyzmeti taratqan aqparatqa qaraǵanda, kúdikti qylmysty 2020 jyly elordada jasaǵan, sodan keıin ol qylmystyq qýdalaý organdarynan boı tasalaǵandyqtan, oǵan halyqaralyq izdeý jarııalanǵan.

Búgin Bas prokýratýra men Іshki ister mınıstrliginiń qyzmetkerleri Syrtqy ister mınıstrliginiń kómegimen kúdiktini qylmystyq jaýapqa tartý úshin Qazaqstanǵa ekstradıtsııalady.

Qazirgi ýaqytta ol Astana qalasynyń tergeý ızolıatoryna qamaldy.

Joǵaryda atalǵan qylmysty jasaǵany úshin ol 10 jyldan 15 jylǵa deıin bas bostandyǵynan aıyrylýy múmkin.