Germanııadaǵy sý tasqynynan 19 adam kóz jumdy

BERLIN. QazAqparat – Germanııanyń batysyna soqqan «Bernd» tsıklonynan týyndaǵan kúshti nóser 19 adamnyń ómirin qıdy. Taǵy 60-qa jýyq adam habar-osharsyz ketken. Bul týraly QazAqparat DW-ge silteme jasap habarlaıdy.

Germanııada qatty nóser saldarynan Reınland-Pfalts federaldy jeriniń Arvaıler aımaǵynda alty úı qulady. Taǵy birneshe ǵımarattyń qulaý qaýpi bar.

Germanııanyń batysyndaǵy túrli aýdandarda apattan 19 adam kóz jumyp, 60-qa jýyq adam habar-osharsyz ketti. Sý tasqyny Reın jáne salalarynyń jaǵasyndaǵy kóptegen qalalarda oryn aldy.

Adamdardy qutqarý úshin tikushaqtar tartyldy. Arvaıler aımaǵynda úzdiksiz nóser men sý tasqynynyń saldarynan tótenshe jaǵdaı jarııalandy. Jergilikti ákimshilik adamdardy múmkindiginshe úıde bolýǵa jáne qajet bolǵan jaǵdaıda joǵarǵy qabattarǵa kóshýge shaqyrdy.

Výppertal polıtsııasynyń habarlaýynsha, nóser kezinde 82 jastaǵy er adam úıiniń sý basqan jertólesine túsip ketken. Qaıǵyly oqıǵa Zolıngen qalasynda oryn alǵan. Zeınetker aýrýhanaǵa jetkizilgenimen, ómirin saqtap qalý múmkin bolmady.

Soltústik Reın-Vestfalııa federaldy jerindegi Merkısher-Kraıs aımaǵynda 46 jáne 52 jastaǵy eki órt sóndirýshi qaıtys boldy. Kelnniń sý basqan jertólelerinde órt sóndirýshiler eki adamnyń máıitin tapty. Arvaıler aýdanynda tórt adam sý tasqynynyń qurbany boldy. Oıskırhen okrýginiń bıligi beısenbide segiz adamnyń qaza tapqany týraly habarlady. Ýnna okrýginde taǵy bir adam sýǵa batyp ketti.

Qatty jańbyr men sý tasqyny elektr qýatyn óshirip, sondaı-aq Reınland-Pfalts, Soltústik Reın-Vestfalııa jáne Saardyń kóptegen bólikterinde aýyz sýdyń toqtap qalýyna sebep boldy. Aıfel taýlarynda ornalasqan eldi mekenderde barlyq mektep jabyldy.

Germanııanyń negizgi temirjol operatory Deutsche Bahn kontserni jolaýshylarǵa jaqyn kúnderi Soltústik Reın – Vestfalııaǵa jáne osy federaldy jerden tys jerlerge barýdan bas tartýǵa shaqyrdy, óıtkeni onyń aýmaǵyndaǵy kóptegen temirjol ýchaskeleri sý astynda qalyp, poıyz qozǵalysyna jaramsyz bolyp qalǵan.

Soltústik Reın – Vestfalııa federaldy jeriniń premer-mınıstri, Germanııa kantsleri laýazymyna kandıdat Armın Lashet (Armin Laschet) sý tasqynynan qatty zardap shekken Hagen qalasyna barýǵa nıetti.

Buǵan deıin habarlanǵanyndaı, Belgııada sý tasqyny saldarynan alty adam kóz jumdy.