Germanııadaǵy marafonda qazaq qyzy ekinshi oryn aldy
ASTANA. QazAqparat - Germanııanyń Gannover qalasynda ótken dástúrli halyqaralyq marafonda qazaq qyzy ekinshi orynǵa ıe boldy, dep habarlaıdy QazAqparat QR Jeńil atletıka federatsııasyna silteme jasap.
Bul marafon 1991 jyldan beri uıymdastyrylyp keledi. Bıyl 28-ret ótkizilgen marafon Halyqaralyq jeńil atletıka federatsııasynyń IAAF Silver Label mártebesine ıe.
Qazaqstannan barǵan sportshylar arasynda Aqmaral Meıirman kúmis júldege qol jetkizdi. Ol áıelder arasyndaǵy klassıkalyq 42 shaqyrym 197 metrlik qashyqtyqty 2:55.58 saǵatta júgirip ótti. Al birinshi kelgen Kenııa sportshysy Agnes Kıproptyń ýaqyt kórsetkishi - 2:32.35 saǵat. Úzdik úshtikti jergilikti sportshy Aıda Shtalhýt qorytyndylady (03:03.13).
Erlerden elimizdiń namysyn qorǵaǵan Mıhaıl Krasılov márege altynshy bolyp jetti. Qazaqstandyq atlet atalǵan qashyqtyqty 2:24.24 saǵatta júgirip ótti. Sóıtip, 2016 jyldan beri eń úzdik kórsetkishin tirkedi. Birinshi oryndy Efıopııa staıeri Sebok Negýss enshiledi (2:09.44). Ekinshi-úshinshi oryndy Kenııadan kelgen Maıkl Kýnıýga (2:10.16) men Dýnkan Koech (2:10.19) ózara bólisti.
Jalpy, Gannover marafonyna (HAJ Hannover Marathon) bıyl 10 myńnan astam adam qatysty.
