Germanııadaǵy qazaq sýretshisi Astanada jeke kórme ashty
ASTANA. 16 mamyr. QazAqparat - Búgin Astanadaǵy Qazirgi zamanǵy óner murajaıynda sýretshi Bolat Mekebaevtyń «Aspanǵa qaraı umtylys» atty jeke kórmesi ashyldy.
Kórmege avtordyń 25-ke tarta keskindemelik týyndylary qoıylǵan. Bunyń aldynda sýretshiniń kórmeleri Almatyda jáne týǵan jeri - Kókshetaý qalasynda ótken bolatyn.
Bolat Mekebaev - Kókshetaý qalasynyń týmasy. 1998 jyldan beri Berlınde turady. Ol Abaı atyndaǵy Qazaq memlekettik ýnıversıtetiniń kórkemsýret-grafıka fakýltetinde kásibı keskindeme tásilderin meńgerip, odan keıin Máskeýde N.I. Kornılovtyń shyǵarmashylyq sheberhanasynda birneshe jyl oqyp, jumys istegen.
Ol 15 jyldan beri Germanııa elinde turady. Búginde sýretshi óziniń belsendi shyǵarmashylyǵymen Qazaqstan mádenıetin Eýropanyń mádenı keńistiginde nasıhattap, ilgeri jyljytyp júr. Berlın, Gannover, Mıýnhen, Maındaǵy Frankfýrt, Ostervınka qalalarynda jáne Polsha, Estonııa elderiniń túrli galereıalarynda 17 jeke kórme ótkizdi. Germanııa, Italııa, Qazaqstan, Nıderlandy jáne Reseıde on eki toptyq kórmege qatysty.
«Bolattyń shyǵarmalary kórermendi máńgilik taqyryptarǵa - ómirdiń qylyshtyń sabyndaı qysqalyǵy men máni týraly oılanýǵa májbúrleıdi. Bolattyń shyǵarmashylyǵy - qazirgi zaman talabyna saı jáne klassıkalyq sıýjetterden jalyqqan jurtshylyqqa dástúrli qazaq mádenıeti men eýropalyq dúnıetanymnyń qosyndysyn quraıdy», - deıdi sýretshiniń atalmysh kórmesin Astanada uıymdastyrýǵa uıytqy bolǵan «OYU» galereıasynyń dırektory, professor, Qazaqstan mádenıetiniń eńbek sińirgen qaıratkeri Gúlmıra Shalabaeva.
Kórme 20 mamyrǵa deıin jumys isteıtin bolady.
