Germanııadaǵy iri sý tasqynynan kelgen shyǵyn 11 mlrd. eýrodan asýy múmkin

Bul týraly Germanııanyń saýda-ónerkásip palatasy birlestiginiń boljamyna silteme jasap nemis BAQ-tary habarlady.

Keltirilgen tsıfrlarǵa qaramastan, saýda-ónerkásiptik palatasynyń ókilderi búgingi kúni keltirilgen zııannyń naqty mólsherin ataýǵa múmkindik beretin oqıǵalardyń tolyq beınesin belgileý múmkin emes ekendigin aıtady.

Degenmen, Magdebýrg aýdanynda Elba ózeniniń deńgeıi búgin jańa rekord ornatyp, jeti metrge jetti. Sarapshylardyń aıtýynsha, bul aýdanda sý tasqyny áli shyrqaý bıigine kóterilgen joq, ol deńgeıge shamamen jeksenbi kúni jetýi múmkin. Saksonııa-Anhalt federaldyq jeriniń ákimshilik ortalyǵynda jáne onyń aınalasynda myńdaǵan qutqarýshylar men eriktiler bógender men bógetterdi nyǵaıtýǵa tyrysýda.

Drezdende apattyń beti qaıtqan tárizdi. Saksonııa federaldyq jeriniń astanasynda Elba deńgeıi azdap tómendedi - 8,76-8,60 metr shamasynda, degenmen sý osy qalanyń úıleri men bógetterine burynǵysha qaýip týǵyzýda. Saksonııa ishki ister mınıstrliginiń habarlaýynsha, bul jaǵdaı Drezdende taǵy 4-5 kúndeı saqtalady.

Budan buryn QazAqparat habarlaǵandaı, Eýroodaq sý tasqynynan eleýli zardap shekken elderge qarjylaı kómek berýge ázir. Germanııanyń yntymaqtastyq qorynan 3,67 mlrd. eýroǵa deıin qarjy bólinýi múmkin.

Eske sala keteıik, Avstrııada, Germanııada jáne Chehııada bolǵan nóser jańbyrdyń saldarynan kúshti sý tasqyny týyndady, sonyń nátıjesinde bul elderdiń birqatar aýdandarynda tótenshe jaǵdaı jarııalandy.