Germanııadaǵy dıoksın janjaly EO Keńesi otyrysynyń basty taqyrybyna aınalmaq
ASTANA. 24 qańtar. QazAqparat - Germanııadaǵy Dıoksın janjaly dúısenbi kúni EO Keńesiniń aýylsharýashylyǵy jáne balyq sharýashylyǵy mınıstrleriniń deńgeıindegi josparly otyrysynda basty taqyrypqa aınalmaq.
EO Keńesi baspasóz qyzmetiniń ókili habarlaǵandaı, mınıstrler qazirgi daǵdarystan sabaq alýǵa nıetti, dep aqparat taratady «Vestı.rý» portaly.
«Atap aıtqanda, mal sharýashylyǵy ónimderiniń sapasyn baqylaýdy jaqsartý múmkindikteri jóninde pikir almasyp, sonymen qatar mal azyǵy óndirisiniń normalaryn saqtaýdy qatańdatýdyń keleshegi talqylanbaq», -dep atap ótti ol.
Germanııa mal sharýashylyǵy ónimderinde dıoksın normasy belgilengennen kóp mólsherde bolýyna baılanysty bul janjal EO-ta sońǵy on jylda tórtinshi ret qaıtalanyp otyr. Osyǵan uqsas jaǵdaı 2003 jyly Germanııada, 2006 jyly Belgııada jáne 2008 jyly Irlandııada oryn alǵan. Eýrokomıssııa sarapshylarynyń baǵalaýynsha, dıoksın janjalyna sapasyz jem qospalary sebep bolyp otyr.
Aı bastalǵannan bastap eýropalyq sarapshylar Germanııadaǵy 600 mal sharýashylyǵyn tekserip, dıoksın normasyn mólsherden asyryp jibergen segiz fermany anyqtaǵan. Eýrokomıssııa búlingen et úshinshi memlekettiń naryǵyna túsken joq dep esepteıdi.
