Germanııadaǵy atystan 8 adam mert bolyp, 5 adam jaraqattandy
HANAÝ. QazAqparat – Batys Germanııa polıtseıleri Hanaý qalasynda 8 adamdy atyp ketken qylmyskerlerdi izdestirýdi bastady, dep habarlaıdy QazAqparat Deutsche Wellege silteme jasap.
Jergilikti polıtsııa ókilderiniń habarlaýynsha, Germanııanyń Hanaý qalasynda sársenbi kúni keshke eki jerde bolǵan atys saldarynan 8 adam mert bolyp, taǵy 5 adam jaraqat aldy. Qaıǵyly oqıǵa 19 aqpan kúni keshki saǵat 10:00-der shamasynda qalanyń ártúrli bóliginde ornalasqan eki kalıan barynda bolǵan.
Qylmyskerler qalanyń ortasyndaǵy birinshi barda atys qarýynan úsh adamdy óltirdi. Sodan keıin Kesselshtadt aýdanyndaǵy ekinshi kalıan baryna baryp, bes adamnyń ómirin qıdy.
Bılik ókilderi aýdandy tolyǵymen qorshaýǵa aldy, polıtsııa olardy izdestirip jatyr. Oqıǵanyń sebebi túsiniksiz, polıtsııa azamattardy oqıǵaǵa qatysty qandaı bir málimet bolsa – quqyq qorǵaý organdarymen baılanysýǵa shaqyrdy.
Aıta ketsek, Hanaý – 100 000 turǵyny bar Gessen jerindegi qala. Ol Frankfýrttyń shyǵysyna qaraı 25 shaqyrym jerde ornalasqan.
