Germanııadaǵy jármeńkede adamdardy kólikpen taptaǵan kúdiktiniń kim ekeni belgili boldy

ASTANA. KAZINFORM – Germanııanyń Magdebýrg qalasynda juma kúni keshki ýaqytta jármeńkede adamdardy kólikpen taptaǵan kúdiktiniń kim ekeni belgili boldy, dep habarlaıdy Kazinform agenttigi BBC-ge silteme jasap.

Germanııanyń shyǵysyndaǵy Magdebýrg qalasynda ótken rojdestvolyq jármeńkede kólik taptap ketken 5 adam qaza boldy. Kúdikti kóp uzamaı ustaldy. Ol Saýd Arabııasynan kelgen dáriger bolyp shyqty.

Barlyǵy 200-den astam adam jaralanǵan. Olardyń kóbisiniń jaǵdaıy aýyr. Jergilikti bıliktiń dereginshe, qaza bolǵandar arasynda bala da bar.

Senbi kúni tústen keıin bolǵan baspasóz máslıhatynda prokýror Horst Ýolter Nopens tergeýshiler kúdiktimen sóılesýdi jalǵastyryp jatqanyn, oǵan 5 adamdy óltirip, talaı adamǵa aýyr dárejedegi dene jaraqatyn keltirdi degen aıyp taǵylǵanyn aıtty.

Keıin birneshe BAQ, onyń ishinde Bı-bı-sı kúdiktiniń aty jónin jarııalady: Taleb al-Abdýlmohsen.

Belgili bolǵandaı, 50 jastaǵy kúdikti Bernbýrg qalasynda turyp, jumys istegen psıhıatr. Ol 2006 jyly Germanııaǵa oqýǵa kelip, 2016 jyly bosqyn dep tanylǵandyqtan osynda qalyp qoıǵan. Qazirgi ýaqytta onyń turaqty turýǵa ruqsaty bar.

Osyǵan deıin Memleket basshysy Germanııa Prezıdenti Frank-Valter Shtaınmaıerge kóńil aıtý jedelhatyn jibergenin habarladyq.