Germanııadaǵy tártipsizdik kezinde qarý-jaraq dúkeni tonaldy

Aldymen bir top adam Snipes aıaq kıim dúkender jelisiniń vıtrınalaryn qıratqan. Oqıǵa ornyna sý atqysh mashınalarmen kelgen polıtsııa tártip buzýshylardy yǵystyrǵan. Alaıda olar jaqyn mańdaǵy kóshege qaraı jyljyp, ondaǵy birneshe dúkendi, sonyń ishinde qarý-jaraq satatyn oryndy tonaǵan.

Tártipsizdikke qatysýshylar dúkenniń vıtrınasyn taspen uryp, judyryqpen jáne aıaqpen teýip syndyrǵan. Sonyń saldarynan áınek birneshe jerden jarylyp, aqyry qıraǵan. Reuters fotografynyń aıtýynsha, olar dúkennen keminde eki qarý urlaǵan. Bastapqyda olardyń jaýyngerlik qarý ekeni belgisiz bolǵan.

Polıtsııa oqıǵadan keıin tergeý barysynda bir adamdy ustady. Sondaı-aq eki qarýdy tárkiledi. Boljam boıynsha, olardyń ekeýi de tonaýǵa ushyraǵan qarý-jaraq dúkeninen alynǵan. Buǵan qosa, aıaq kıim dúkeni tonalyp, ózge saýda oryndarynyń da vıtrınalary syndyrylǵan.

Frankfýrtte Z býynynyń narazylyq aktsııasy kúshpen taratyldy

Shamamen 8 myń adam qatysqan Z býynynyń sherýi birneshe saǵat boıy beıbit ótken. Alaıda keshke qaraı jaǵdaı ýshyǵyp ketken.

Gessen federaldy jeriniń Іshki ister mınıstrliginiń málimetinshe, solshyl ekstremıstik toptyń 100-ge jýyq múshesi polıtsııaǵa bótelke, tas jáne otshashý laqtyrǵan. Al BILD basylymynyń habarlaýynsha, tártip buzýshylardyń sany 1 myńnan áldeqaıda kóp bolǵan.

Birneshe polıtseı jaraqat alyp, aqyry quqyq qorǵaý organdary narazylyq aktsııasyn kúshpen taratty.

Alaıda tártipsizdik munymen toqtamaǵan. Adamdar toby qala ortalyǵynda júrip, ásirese Tsaıl kóshesinde jaǵdaıdy ýshyqtyrǵan. Frankfýrttiń eń tanymal saýda kóshesi qorshaýǵa alynyp, oqıǵa ornyna kóp mólsherde polıtsııa kúshi jumyldyryldy.

Tártipsizdik kezinde beıbit turǵyndar da zardap shekti. Jınalǵan jurtqa birneshe ret petarda laqtyrylǵan. Oqıǵaǵa baılanysty ondaǵan adam ustaldy. Qala ortalyǵyndaǵy jaǵdaı keshke deıin shıelenisti kúıde qalǵan.

Aıta keteıik, buǵan deıin Germanııanyń 30-dan astam qalasynda jastardyń narazylyq aktsııasy ótip jatqanyn jazdyq.