Germanııadaǵy sý tasqyny: qutqarýshy qaıtys boldy, iz-túzsiz joǵalǵandar bar
ASTANA. KAZINFORM – Germanııanyń ońtústiginde jaýǵan nóser jaýyn sý tasqynyna sebep boldy. Bir adam qaza tapqany belgili. 22 jastaǵy órt sóndirýshi men jertólesin sý basqan áıel iz-túzsiz joǵaldy. 3 myń adam evakýatsııalandy, dep habarlaıdy euronews.
Bavarııanyń ońtústigindegi Ilm ózeni boıyndaǵy Pfaffenhofen qalasynda turǵyndardy sý tasqynynan evakýatsııalaý kezinde qutqarýshylardyń biri sýǵa batyp ketti. Ol úsh áriptesimen birge úrlemeli qaıyqta bolǵan.
Shtýtgarttan shyǵysqa qaraı 50 shaqyrymdaı jerdegi Shvebısh-Gmýnd qalasyna jaqyn jerde senbi kúni keshke joldyń bir bóliginiń astynda topyraq shógip, uzaq qashyqtyqqa qatynaıtyn poıyz relsten jartylaı shyǵyp ketken. Borttaǵy 185 jolaýshy zardap shekken joq. Nemis temirjol operatory Deutsche Bahn toqtatýlar men keshigýler týraly eskertti. Mıýnhennen Berlınge, Shtýtgart pen Tsıýrıhke (Shveıtsarııa) baratyn baǵyttardy qosa alǵanda, kólik qozǵalysy buzyldy.
Germanııa bıligi ońtústik Bavarııa jeriniń turǵyndaryn keıbir aýdandarda sý tasqyny kúsheıýine baılanysty evakýatsııalaý týraly úndeýlerge qulaq asýǵa shaqyrdy. Іshki ister mınıstri Nensı Fezer turǵyndardy qutqarýshylardyń kez kelgen eskertýlerin muqııat qabyldaýǵa shaqyryp, olardy ustaný adamdardyń ómirin saqtap qalýy múmkin ekenin qosyp aıtty.
Bavarııanyń premer-mınıstri Markýs Zeder Mıýnhenniń soltústik-batysyndaǵy Aýgsbýrg mańynda zardap shekken aýdandardyń birine bardy.
«Jaǵdaı únemi ózgerip jatyr. Qazirgi kezde jaǵdaı óte aýyr, ásirese Aýgsbýrg pen Ýnteralgaý tóńiregindegi Shvabııa aımaǵynda, mysaly, Gıýntsbýrgte. Sý deńgeıi kóterilip jatyr», - dedi ol.
Onyń aıtýynsha, zardap shekken aımaqtarda tótenshe jaǵdaılar qyzmeti jumys istep jatyr jáne sý tasqyny úlken shyǵyn ákeldi.
Fıshah aýdandyq basqarmasy adamdarǵa úılerinen tez arada ketýge jáne jer asty kólik turaqtary men jertólelerge kirmeýge keńes beretin buıryq shyǵardy. Keıbir adamdardy tikushaqpen evakýatsııalaýǵa týra keldi. Nemis qutqarýshylar odaǵynyń qyzmetkerleri turǵyndardy qaıyqtarmen alyp shyqty, adamdardy evakýatsııalaý úshin de traktorlar paıdalanyldy.
Qazir alty okrýgte tótenshe jaǵdaı jarııalandy. Meteorologtar taǵy da jańbyr jaýyp, kún kúrkireıtinin eskertti.
