Germanııadaǵy poıyz apaty: úsh adam qaza taýyp, 34 jolaýshy jaraqat aldy
BERLIN. KAZINFORM – Baden-Vıýrtemberg federaldy jerinde bolǵan temirjol apatynda úsh adam qaza taýyp, 34 adam túrli jaraqat aldy, dep habarlaıdy BILD basylymy.
Jeksenbi kúni keshkisin jolaýshylar poıyzy relsten shyǵyp ketken.
– Deutsche Bahn kompanııasyna tıesili aımaqtyq ekspress poıyzdyń eki vagony relsten shyǵyp ketti, – delingen Shtýtgart polıtsııasynyń ókili BILD-ke bergen málimdemesinde.
Poıyz Zıgmarıngen qalasynan Ýlm baǵytyna qaraı bet alǵan. Apat kezinde poıyzda 100 jolaýshy bolǵan. Poıyzdyń bir bóligi aýdarylyp jatyr, bir vagonnyń tóbesi ashylyp ketken. Relsten tolyq shyǵyp ketken vagondar aǵashtardyń arasyna qulaǵan. Oqıǵa ornynda polıtsııa, órt sóndirýshiler men qutqarýshylar jumys istep jatyr.
Aldyn ala boljam boıynsha apattyń sebebi kúshti naızaǵaı bolýy múmkin.
Polıtsııanyń málimetinshe, apatqa ushyraǵan – Ýlm baǵytyna bet alǵan aımaqtyq poıyz. Tótenshe jaǵdaı týraly alǵashqy habarlama saǵat 18:10-da túsken.
Federaldy polıtsııanyń baspasóz hatshysy apattyń naqty sebebi áli anyqtalyp jatqanyn habarlady.
Apat bolǵan mańda turatyn áıel BILD basylymyna bergen suhbatynda oqıǵa kezinde qatty naızaǵaı bolǵanyn aıtqan. Alaıda bul aqparatty polıtsııa ázirge rastamady.
Buǵan deıin Germanııada 400 jolaýshysy bar poıyz týnnel ishinde birneshe saǵat turyp qalǵanyn jazdyq.