Germanııadaǵy orman órti 390 gektarǵa jýyq aýmaqty sharpydy
ASTANA. KAZINFORM – Germanııanyń soltústigindegi Mıýrıts ulttyq saıabaǵynda shyqqan orman órti shamamen 388 gektar aýmaqty sharpydy. Órtti sóndirýge Býndesver áskerı qyzmetshilerin qosa alǵanda 370-ke jýyq adam jumyldyryldy, dep habarlaıdy BELTA.
Órt týraly alǵashqy habarlama dúısenbi kúni túsken. Osy ýaqyt ishinde bılik jaqyn mańdaǵy birneshe aýyldyń turǵyndaryn birneshe ret evakýatsııalady.
Órttiń keń taralýyna uzaq ýaqyt boıy jaýyn-shashynnyń bolmaýy áser etip otyr. Buǵan qosa, batystan soqqan jel jalynnyń kúsheıýine sebep bolýda. Mamandardyń boljamynsha, demalys kúnderi tilsiz jaý shyǵys jáne ońtústik-shyǵys baǵytta odan ári taralýy múmkin.
– Órtti sóndirý jumystary bul aýmaqta burynǵy keńestik áskerı polıgonnyń ornalasýyna baılanysty kúrdelenip otyr. Sebebi jarylmaı qalǵan oq-dárilerdiń qaýpi áli de saqtalǵan. Sondyqtan órt sóndirýshiler negizinen arnaıy tehnıka kire alatyn ári qutqarýshylar úshin qaýipsiz sanalatyn shyǵys bólikte jumys júrgizip jatyr, – dep jazdy basylym.
Mıýrıts ulttyq saıabaǵynyń aýmaǵy 322 sharshy shaqyrymdy quraıdy. Onyń basym bóligin qaraǵaıly orman alyp jatyr. Sondaı-aq saıabaq aýmaǵynda 107 kól, onyń ishinde Mıýrıts kóliniń bir bóligi ornalasqan.
1945-1993 jyldar aralyǵynda qazirgi qoryqtyń bir bóligi Keńes armııasynyń áskerı polıgony retinde paıdalanylǵan.
Aıta keteıik, buǵan deıin Germanııadaǵy aptap ystyqtan 5 myńnan astam adam kóz jumǵany habarlanǵan bolatyn.
