Germanııadaǵy kitap kórmesinde 350-ge jýyq otandyq kitap tanystyryldy
ASTANA. KAZINFORM – Qazaqstan delegatsııasy 30-dan astam baspa men ádebıet salasynyń ókilderinen turatyn qurammen Germanııadaǵy 77-shi «Frankfurter Buchmesse 2025» halyqaralyq kitap jármeńkesine qatysyp jatyr. Bul týraly Kazinform agenttigi Mádenıet jáne aqparat mınıstrligine silteme jasap habarlaıdy.
15 qazanda Germanııanyń Maındaǵy Frankfýrt qalasynda álemdegi eń iri kitap kórmeleriniń biri — 77-shi «Frankfurter Buchmesse 2025» halyqaralyq kitap jármeńkesi ashyldy.
Jármeńkege 30-dan astam qazaqstandyq baspa ókilderi men ádebıet salasynyń delegatsııasy qatysýda. Olardyń quramynda «Mektep», «Almatykitap», «Atamura», «ARMAN-PV», «Steppe & World Publishing», «Evero», «Kazformoms», «AmalBooks» sııaqty baspalar bar.
QR Mádenıet jáne aqparat mınıstrliginiń qoldaýymen arnaıy stend uıymdastyrylyp, 350-ge jýyq otandyq kitap pen jańa basylymdar qoıyldy.
Ekspozıtsııa qazirgi qazaq ádebıeti men baspa isiniń zamanaýı baǵyttaryn, jańa avtorlardyń shyǵarmalaryn kórsetedi.
Qazaqstannyń bedeldi halyqaralyq kórmege qatysýynyń ózi halyqaralyq yntymaqtastyqtyń joǵary áleýetin kórsetedi.
Qazaqstan Respýblıkasynyń Maındaǵy Frankfýrt qalasyndaǵy Bas konsýly kórmeniń alǵashqy kúni Ulttyq stendke arnaıy kelip, qazaqstandyq delegatsııaǵa qoldaý bildirdi.
Kanada, Qytaı, Túrkııa, Ázerbaıjan, Danııa, Germanııa jáne Ulybrıtanııa sııaqty elderdiń baspagerleri Qazaqstan stendimen tanysyp, yntymaqtastyq boıynsha kelissózder júrgizdi.
Kórme aıasynda QR Ulttyq stendinde jeti tilge aýdarylǵan «Abaıdyń qara sózderi. Urpaqqa Ulaǵat» kitabynyń tusaýkeseri ótti.
Іs-shara uıymdastyrýshylarynyń aıtýynsha, kitap jármeńkesi aıasynda oqyrmanǵa qazaq halqynyń taǵdyry men rýhanı qundylyqtaryn beıneleıtin Mirjaqyp Dýlatovtyń máńgilik shyǵarmasy — «Baqytsyz Jamal» usynylady.
Aıta ketsek, buǵan deıin Djo Dıspenzanyń «Aqyldyń múmkindigi sheksiz» kitaby qazaq tilinde jaryq kórgenin habarlaǵanbyz.