Germanııadaǵy qylmys deńgeıi: el qanshalyqty qaýipsiz?

ASTANA. KAZINFORM — Áleýmettik jelilerde ońtústikafrıkalyq-nemis bloger Kýrt Kats túsirgen beınerolık kóp talqyǵa tústi. Ol Frankfýrt-na-Maındaǵy basty vokzal mańynda nashaqorlardy, úısizderdi jáne agressııa kórinisterin kórsetken. 

Kóptegen pikirlerde ksenofobııalyq reńk baıqaldy. Blogerdiń aıtýynsha, mundaı jaǵdaı — búkil Germanııanyń shynaıy beınesi.

Alaıda sarapshylar bul pikirmen kelispeıdi. Deutsche Welle-ge suhbat bergen krımınolog Zýzanne Karshtedttyń aıtýynsha, mundaı aımaqtar barlyq elderde kezdesedi, al Germanııadaǵy jalpy jaǵdaı qaýipsiz sanalady.

— 1980-1990 jyldardan beri qylmys deńgeıi aıtarlyqtaı tómendedi. Germanııa — óte qaýipsiz elderdiń biri, — dedi ol.

Statıstıkaǵa súıensek, kisi óltirý kórsetkishi boıynsha Germanııa álemde 147-orynda tur: 100 myń turǵynǵa shaqqanda 0,91 jaǵdaı. Salystyrý úshin: AQSh-ta bul kórsetkish 6-ǵa jýyq, al Ońtústik Afrıkada 40-tan asady.

Degenmen sońǵy jyldary elde keıbir qylmys túrleri, ásirese zorlyq-zombylyq sıpatyndaǵy qylmystardyń artýy baıqalady. Sarapshylardyń aıtýynsha, qylmystardyń basym bóligin jastar, sonyń ishinde mıgranttar jasaıdy.

— Kópshiligi elge otbasynsyz keledi, qoǵam tarapynan baqylaýsyz ómir súredi. Olardyń kóbi soǵys qasiretin bastan keshken, — dedi Zýzanne Karshtedt.

Onyń pikirinshe, tabysty ıntegratsııa qylmys deńgeıin aıtarlyqtaı tómendetýge yqpal etedi.

Sonymen qatar polıtsııa men zertteýshiler «qarańǵy aımaq» uǵymyn qoldanady. Bul resmı tirkelmegen qylmystarǵa qatysty. Mundaı derekter az habarlanǵan jaǵdaıda jalpy qylmystyń obektıvti beınesin qurý qıyndaı túsedi.

Aıta keteıik, Germanııada qoqys jáshikterin jappaı tekserý bastalady.