Germanııadaǵy qandastar Naýryz merekesin qalaı toılaıdy
ASTANA. KAZINFORM — Germanııadaǵy qazaq dıasporasy úshin Naýryz merekesi — bas qosyp, bereke-birlikti nyǵaıtatyn erekshe kúnderdiń biri. Bul týraly QazAqparat tilshisine Keln qalasyndaǵy qazaq mádenı ortalyǵynyń tóraıymy Marjan Pıshkınel aıtyp berdi.
Onyń aıtýynsha, Keln qalasyndaǵy qazaqtar Naýryz merekesin múmkindigine qaraı uıymdastyryp turady.
Merekeni ótkizý týraly sheshimdi ortalyqtyń tóralqa músheleri birlesip qabyldaıdy. Daıyndyq barysynda merekege arnalǵan zal jaldanyp, shaqyrý qaǵazdary daıyndalady, sondaı-aq Germanııadaǵy qazaq konsýldyqtary men elshilik ókilderine shaqyrý jiberiledi.
— Qoǵamnyń belsendi apalary Naýryz kóje daıyndap, kelgen qonaqtarǵa túrli taǵam usynylady. Sýsyndar da beriledi. Bıyl alǵash ret merekelik keshti aqyly túrde ótkizýdi josparlap otyrmyz. 10 jasqa deıingi balalarǵa kirý tegin bolady, — dedi Marjan Pıshkınel.
Merekelik keshtiń baǵdarlamasynda qazaq ánderi oryndalyp, Qazaqstannan arnaıy ánshi shaqyrý josparlanǵan. Kesh sońynda qonaqtar úshin bı keshi uıymdastyrylyp, qazaq jáne túrik tilderindegi ánder shyrqalady.
Іs-sharaǵa Keln qalasy men onyń mańynda turatyn qazaqtar, Qazaqstannan kelgen stýdentter, qoǵam músheleri jáne qazaq halqynyń salt-dástúrine qyzyǵýshylyq tanytqan jergilikti turǵyndar qatysady. Sonymen qatar balalarǵa arnalǵan oıyndar men túrli jarystar ótkizilip, syılyqtar taratylady.
Marjan Pıshkıneldiń aıtýynsha, Keln qalasynda 1982 jyly qurylǵan «Keln qazaq mádenı ortalyǵy» búginde resmı túrde jumys istep keledi. Qoǵamnyń shamamen 80 múshesi bar.
Jalpy qalada 150-200-den astam qazaq otbasy turady. Germanııadaǵy qazaqtardyń basym bóligi kezinde Túrkııadan jumys babymen qonys aýdarǵan azamattar men olardyń urpaqtary.
Osyǵan deıin Mońǵolııadaǵy qazaqtar Naýryz meıramyn qalaı toılaıtynyn jazǵanbyz.
