Germanııadaǵy ereýil: poıyz mashınısteri jumysyn toqtatty

Germanııada júk jáne jolaýshylar poıyzdarynyń júrgizýshileri úsh kúndik narazylyq aktsııasyn bastap, bul búkil el boıynsha temirjol qatynasynda úzilisterge ákeldi. Sonymen birge nemis fermerleri sýbsıdııalardyń josparly qysqartylýyna narazylyq bildirip, joldardy jaýyp jatyr. Kazinform agenttigi bul týraly VVS-ge silteme jasap habarlaıdy. 

Deutsche Bahn (DB) ulttyq temirjol operatorynyń málimetinshe, uzaq saparǵa shyǵatyn poıyzdardyń shamamen 80%-y toqtatyldy. Shekteýler aımaqtyq tasymaldaýǵa da áser etedi.

Mashınıster kásipodaǵy jalaqyny kóterýdi, sondaı-aq poıyz mashınısteriniń jumys ýaqytyn aptasyna 38 saǵattan 35 saǵatqa deıin qysqartýdy talap etip otyr.

Deutsche Bahn bul talaptardy qanaǵattandyra almaıtynyn aıtty.

Mashınısterdiń narazylyǵynan mıllıondaǵan jolaýshylar josparlarynan bas tartýǵa nemese dittegen jerine jetýdiń basqa joldaryn izdeýge májbúr boldy.

Ereýil 10 qańtarda bastalyp, juma, 12 qańtarda aıaqtalýy tıis. Osy ýaqytqa deıin Germanııada poıyzdar ýaqytsha apattyq kestemen júredi.

Fermerlerdiń ereýili

Nemis fermerleriniń narazylyq sherýi ótken jyldyń jeltoqsanynan jalǵasyp jatyr. Dúısenbiden bastap fermerler keıbir tasjoldar kireberisterin traktorlarymen jaýyp, qalalar men eldi mekenderde mıtıng ótkizýde. Narazylyq sharalary kólik qozǵalysyn qıyndatqan.

Fermerler ótken jyldyń sońynda bıýdjet tapshylyǵyn qysqartýǵa baǵyttalǵan birneshe qatań sharalar engizgen Germanııa úkimetimen apta boıy kelissózder júrgizdi.

Sonymen qatar bılik dızeldik otynǵa dotatsııany alyp tastaýdy jáne aýyl jáne orman sharýashylyǵynda qoldanylatyn tehnıkany kólik salyǵynan bosatpaýdy kózdedi.

Sharýalardyń jappaı narazylyǵynan keıin úkimet bıýdjetti únemdeý sharalaryn jumsartýǵa kelisti. Atap aıtqanda, dotatsııany kezeń-kezeńimen alyp tastaý týraly sheshim qabyldap, tehnıkaǵa salyq jeńildikterin qaldyrdy.

Degenmen bul sharalar fermerlerdi tynyshtandyrýǵa kómektesken joq. Olar úkimetten sýbsıdııany qysqartýdan tolyǵymen bas tartýdy talap etip otyr.