Germanııadaǵy eks-sýdıa Aıgúl Saılybaevanyń isi: Qazaqstanda da qylmystyq is qozǵaldy
ASTANA. KAZINFORM – Іshki ister mınıstriniń orynbasary Sanjar Ádilov byltyr maýsym aıynda Germanııada kóz jumǵan eks-sýdıa Aıgúl Saılybaevanyń isine qatysty túsinik berdi.
– Germanııa aýmaǵynda Qazaqstan azamatyna qatysty asa aýyr qylmys jasaý máselesi boıynsha Bas prokýratýra aınalysyp jatyr. Óıtkeni halyqaralyq quqyq qorǵaý is-qımylynda ýákiletti organy sanalady, - dedi S. Ádilov Senatta tilshiler suraǵyna jaýap bere otyryp.
Sonymen qatar ol Qazaqstanda jábirlenýshini azaptaý maqsatynda asa qatygezdikpen, qorlaýmen jasalǵan zorlyq-zombylyq áreketteri boıynsha qylmystyq is qozǵalǵanyn rastady.
– Qazaqstanda qozǵalǵan qylmystyq istiń bar ekenin, ıaǵnı Qylmystyq Kodekstiń 110-babyndaǵy azaptaý boıynsha qylmystyq is tergelip jatqanyn rastaımyn. Bul derek jábirlenýshiniń týystarynyń ótinishteri negizinde qarastyryldy. Osy oqıǵalar sol kezde erli-zaıyptylardyń Qazaqstan aýmaǵynda – Jetisý oblysynda turǵan kezeńde bolǵan. Atap aıtqanda, Germanııada qasaqana kisi óltirý deregi tergelse, al bizde dene jaraqatyn keltirý jáne áıelin azaptaý jaǵdaıy tekserilip jatyr, - dedi Іshki ister mınıstriniń orynbasary.
Sonymen qatar ol qazir birqatar saraptama júrgizilip jatqanyn naqtylady.
Bıyl tamyz aıynda Germanııa jaǵy eks-sýdıa Aıgúl Saılybaevanyń is boıynsha tergeý áli aıaqtalmaǵanyn habarlady.
Eske salaıyq, ótken jyldyń maýsym aıynda Germanııada eks-sýdıa Aıgúl Saılybaevanyń zorlyq-zombylyq belgisi bar máıiti tabylǵan bolatyn.
40 jastaǵy Aıgúl Saılybaeva Sheffıldte (Anglııa) bilim alyp, keıin Astanada sýdıa bolyp jumys istegen. Keıingi jyldary ol kúıeýi, qyzy jáne enesimen birge Germanııanyń Benshaım qalasynda turǵan.
Onyń denesi qala shetinen tabyldy. BAQ derekterine sáıkes, marqumnyń qolynda, moınynda jáne betinde pyshaq jaraqattary bolǵan.
Sonymen qatar Aıgúl Saılybaevamen birge onyń 49 jastaǵy enesi Natalıa Dontsova da joǵalyp ketkeni belgili boldy. Ol 4 maýsym kúni nemeresin balabaqshadan alyp, úıine ákelgen. Sol ýaqyttan beri Natalıa Dontsovadan esh habar joq.
Aıta ketelik Eks-sýdıa Aıgúl Saılybaevanyń isi boıynsha marqumnyń enesine halyqaralyq izdeý jarııalanǵan edi.