Germanııadaǵy burynǵy bas dáriger Nıger elinde patsha atandy
ASTANA. KAZINFORM — Doktor Issıfı Djıbeı 20 jyldan astam ýaqyt boıy Rendsbýrg qalasynda klınıkaǵa basshylyq etken. Zeınetke shyqqannan keıin jubaıymen birge Shlezvıg-Golshteın jerinde turǵan, dep habarlaıdy BILD basylymy.
Ol týǵan eli Nıgerge, ásirese bıleýshi mártebesinde oralýdy josparlamaǵan. Bul Batys Afrıkadaǵy eń kedeı elderdiń biri sanalady.
Djıbeı 1970 jyly stıpendııa alyp, Germanııaǵa kelip, medıtsınalyq bilim alǵan. Kásibı jetistikterimen qatar, onyń tekti áýletten shyqqany da belgili: ol aqsúıek áýlet ókiline jatady jáne 2023 jyly qaıtys bolǵan burynǵy monarhtyń yqtımal muragerleriniń biri sanalǵan. Onyń aıtýynsha, saılaýǵa qatysýdan nemese tájdi qabyldaýdan bas tartsa, otbasy muny quptamas edi.
Nıgerde memlekettik bılik el astanasy Nıameı qalasyndaǵy ortalyq úkimettiń qolynda bolǵanymen, dástúrli basqarý júıesi de saqtalǵan. 150 myńǵa deıin adam turatyn Kokorý óńirinde bılik aýyl aqsaqaldary keńesi saılaıtyn koroldiń qolynda.
Saılaýǵa 10-nan astam úmitker qatysqan. Nemis buqaralyq aqparat quraldarynyń habarlaýynsha, keıbir qarsylastary tipti Djıbeıge qoqan-loqqy kórsetken. Soǵan qaramastan, ol 51 daýystyń 25-in alyp, jeńiske jetken. Osy sátten bastap burynǵy nemis bas dárigeri Kokorýdyń ámiri atanyp, bul qyzmetti ómir boıy atqaratyn boldy.
Djıbeıdiń aıtýynsha, eldegi jaǵdaı áli de kúrdeli, jıhadshyl toptardyń belsendiligi aıtarlyqtaı qaýip tóndiredi. Sondyqtan ol el aýmaǵynda tek kúzetpen ǵana júre alady.
Óz mindetin ol jergilikti turǵyndar men ortalyq bılik arasyndaǵy dáneker bolý dep sanaıdy. Ámir salyq jınaýǵa jáne sot sheshimderin shyǵarýǵa quqyly. Sonymen qatar óńirdiń ınfraqurylymyn damytyp, resýrstardy tıimdi paıdalanyp, halyqqa paıda ákelýdi kózdep otyr.
Djıbeı Germanııadaǵy ómirinen tolyq bas tartpaıdy: ol ara-tura Shlezvıg-Golshteınge oralyp turýdy josparlap otyr. Ol bolmaǵan kezde Nıgerdegi mindetterin onyń aǵasy atqarady.
Buǵan deıin Nıger, Reseı jáne Qytaı Iran boıynsha MAGATE qararyna qarsy daýys bergeni habarlanǵan. Qujat qarýǵa jaqyn deńgeıge deıin baıytylǵan ýran qory týraly naqty aqparat usynýǵa shaqyrady. Qarardy 35 el qoldap, taǵy 12 memleket qalys qalǵan.
Qazirgi ýaqytta Nıger bıligi AQSh, Reseı jáne Qytaımen ýran satý jóninde kelissózder júrgizip jatyr. Financial Times basylymynyń dereginshe, el shıkizatty kez kelgen satyp alýshyǵa satýǵa daıyn. Nıameıde jalpy quny 240 mln dollar bolatyn shamamen myń tonna ýran saqtaýly.