Germanııadaǵy árbir úshinshi kompanııa qyzmetkerlerin qysqartýdy josparlap otyr
ASTANA. KAZINFORM — Germanııadaǵy kompanııalardyń úshten birine jýyǵy ekonomıkalyq ahýaldyń nasharlaýyna baılanysty 2027 jyly qyzmetkerler sanyn qysqartýdy kózdep otyr. Sonymen qatar kásiporyndardyń shamamen 40 paıyzy ınvestıtsııa kólemin azaıtýdy josparlaǵan. Bul týraly BILD basylymy jazdy.
Germanııa ekonomıkasy ınstıtýtynyń (IW) zertteýine qaraǵanda, jekemenshik kompanııalardyń 32 paıyzy kelesi jyly qyzmetkerlerin qysqartýdy josparlap otyr. Kóktemde bul kórsetkish 29 paıyz bolǵan. Al árbir altynshy kásiporyn ǵana jumysshylar sanyn kóbeıtýdi kózdeıdi.
Zertteý 2026 jylǵy qazanda júrgizilgen. Saýalnamaǵa myńnan astam kompanııa qatysqan. Nátıjesinde kásiporyndardyń 80 paıyzy kelesi jyly óndiris kólemi burynǵy deńgeıde qalady nemese qysqarady dep esepteıtini anyqtalǵan.
Ásirese, qurylys salasy men ónerkásiptegi ahýal qıyn. Zertteýshilerdiń málimetinshe, ónerkásiptik kásiporyndardyń 47 paıyzy óz jaǵdaıyn byltyrǵydan nashar dep baǵalaǵan. Bul sektordaǵy kompanııalardyń shamamen 30 paıyzy jumys oryndaryn qysqartýdy josparlasa, ınvestıtsııa kólemin arttyrýǵa nıettilerdiń úlesi nebári 19 paıyz bolǵan.
Sarapshylar ekonomıkalyq ahýaldyń nasharlaý sebepteriniń biri retinde AQSh pen Iran arasyndaǵy qaqtyǵysty ataıdy. Ol energııa kózderi baǵasynyń ósýine jáne ınflıatsııanyń jedeldeýine áser etip, nesıe qunyn qymbattatty. Sonyń saldarynan kásiporyndardyń qarjylyq qıyndyqtary kúsheıgen.
Qurylys sektorynda óndiris kólemi tómendeıdi dep boljaıtyn kompanııalardyń úlesi 23 paıyzdan 26 paıyzǵa ósken. Sonymen qatar bul salanyń qosylǵan quny 2019 jylǵy deńgeıden 20 paıyzdan astam tómen.
IW ekonomıkalyq zertteýler bóliminiń basshysy Mıhael Gremlıng 2026 jyly Germanııa ekonomıkasynda baıqalǵan qysqa merzimdi qalpyna kelý jańa quldyraýǵa ulasýy múmkin ekenin eskertti.
Sarapshynyń sózinshe, nemis bıznesi 2005 jyldan bergi eń uzaq teris ekonomıkalyq boljamdar kezeńin bastan ótkerip jatyr. Ol ekonomıkalyq reformalar júrgizý qajet ekenin aıtty. Óıtkeni Germanııa syrtqy faktorlardyń esebinen jaǵdaıdyń jaqsarýyna úmit artpaýy kerek.
Eske salaıyq, munyń aldynda Germanııada jumyssyzdar sany 3 mıllıonǵa jýyqtaǵanyn jazyp edik.
