Germanııadaǵy árbir besinshi zeınetker aıyna 1400 eýro alady

ASTANA. KAZINFORM — Bul rette eldegi áıelderdiń zeınetaqysy erlerge qaraǵanda tómen, dep habarlaıdy DW.

Germanııanyń Federaldy statıstıka basqarmasynyń málimetinshe, 65 jastan asqan nemis zeınetkerleriniń ortasha tabysy aıyna 1990 eýrony quraıdy.

Olardyń 20 paıyzy aıyna 1400 eýrodan artyq tabys tappaıdy. Salystyrmaly túrde, Germanııa halqynyń jalpy ortasha tabysy – 2300 eýro. Al eń kóp tabys tabatyn zeınetkerlerdiń 20 paıyzy aıyna 2870 eýrodan artyq alady.

Germanııadaǵy egde jastaǵy adamdardyń tabysynyń 92 paıyzy zeınetaqydan turady. Qalǵany – múlik kirisi, jumys isteýden túsken tabys jáne basqa da kózder, dep jazady Der Spiegel basylymy.

Zeınetkerlikke shyqqan áıelderdiń tabysy erlerge qaraǵanda aıtarlyqtaı tómen – áıelder orta eseppen 1720 eýro alsa, erler 2320 eýro alady. Basylym atap ótkendeı, bul ómir boıy áıelderdiń jumysqa az ýaqyt jumsaǵanymen baılanysty.

Germanııada memlekettik qoldaýǵa táýeldi zeınetkerler sany artyp keledi.

Vedomstvonyń málimetinshe, ótken jyly shamamen 739 myń adam qartaıǵan shaqtaǵy bazalyq áleýmettik kómek alǵan. Bul kórsetkish 2020 jylmen salystyrǵanda 31%-ǵa kóp. 

Osydan buryn Germanııada jasy 100-den asqan adamdardyń sany artqanyn jazǵan edik. Máselen 2024 jyly Germanııada jasy 100-den asqan 17 900 adam turǵan. Bul kórsetkish 2011 jylmen salystyrǵanda shamamen 25%-ǵa kóp.