Germanııada júzdegen jastar dúkenderdi tonap, 19 polıtseıdi jaraqattady
ShTÝTGART. QazAqparat – Germanııanyń Shtýtgart qalasynda senbiden jeksenbige qaraǵan túni jappaı tártipsizdikter oryn aldy: júzdegen adam dúkenderdi qıratyp, polıtseılerge shabýyl jasady. 20-ǵa jýyq polıtsııa qyzmetkeri jaraqat aldy, dep habarlaıdy VVS.
Tilshilerge Shtýtgart qalasy polıtsııasynyń vıtse-prezıdenti Tomas Berger málim etkendeı, qaqtyǵystar esirtki qoldaný faktisi boıynsha polıtseıler 17 jastaǵy er baladan jaýap alǵannan keıin bastaldy. Tártip saqshylary sol kúni keshke esirtki satýshylardy ustaý sharalaryn ótkizgen.
Osydan keıin Shlossplatts ortalyq alańynda basym bóligi jastardan quralǵan 100-200-ge jýyq adam polıtseılerge tas pen bótelkeler laqtyra bastaǵan. Shabýyl jasaýshylardyń qatary jyldam artyp, 500-ge jetken. Olardyń deni betperdede nemese kapıýshonda bolǵan.
Jınalǵandar sondaı-aq qala ortalyǵynda dúkenderdiń vıtrınalaryn syndyryp, tonaǵan.
Saldarynan 19 polıtseı jaraqat aldy, 12 patrýl kóligi zaqymdandy. Barlyǵy 40 dúkenge shyǵyn keldi, onyń 9-y tonaldy.
Jergilikti polıtsııa basshysy Frank Lýttstiń aıtýynsha, sońǵy 3-4 aptada «oıyn-saýyq keshin unatatyndar» birneshe márte tártip saqshylaryna qarsylyq tanytqan. Olar qoǵamdyq oryndarda ishimdik iship, áleýmettik jelilerde polıtseılerge qarsy agressııa tanytyp kelgen.
Qala meri Frıts Kıýnniń sózinshe, sol kúni keshke qala ortalyǵynda adamdar erekshe kóp bolǵan. Sebebi koronavırýs pandemııasyna baılanysty túngi klýbtar áli de jabyq tur.
Polıtsııa barlyǵy 24 adamdy tutqyndady. Onyń 12-si – Germanııanyń, qalǵan 12-si – ózge elderdiń azamattary.
