Germanııada júrgizýshisiz elektr júk kóligi jolǵa shyqty
ASTANA. KAZINFORM — Germanııada Lidl kompanııasy alǵashqy júrgizýshisiz elektr júk kóligin synaqtan ótkizý úshin jolǵa shyǵardy. Sýpermarketter jelisi bolashaqta taýar jetkizý úshin avtonomdy júk kólikterin paıdalanýdy josparlap otyr. Pılottyq joba Gessen federaldyq jerindegi Edermıýnde qalasynda bastaldy.
Kompanııanyń saıtynda habarlanǵandaı, Germanııanyń Avtomobıl kóligi federaldyq basqarmasy (KBA) alǵash ret «joǵary deńgeıde avtomattandyrylǵan» kólik quralyn paıdalanýǵa ruqsat bergen.
Júk kóligin shvedtik tehnologııalyq kompanııa Einride shyǵarǵan. Kólik júrgizýshi-operatorsyz qozǵalady, al qajet bolǵan jaǵdaıda operatorlar ony qashyqtan basqarýǵa qosyla alady. Syrtqy kelbeti de kádimgi júk kóligine emes, ózdiginen qozǵalatyn úlken konteınerge kóbirek uqsaıdy.
Synaq barysynda elektr júk kóligi kúnine úsh ret taratý ortalyǵynan Lidl dúkenine azyq-túlik taýarlaryn jetkizedi. Onyń júrip ótetin baǵyty shamamen 400 metrdi quraıdy.
Kompanııa bolashaqta júrgizýshiler tapshylyǵy máselesin osyndaı júrgizýshisiz júk kólikteri arqyly sheshýdi kózdep otyr. Alaıda qazirgi synaq kezeńinde elektr júk kóligi mindetti túrde ilesip júretin kólikpen birge qozǵalady.
Eske sala keteıik, buǵan deıin Fınlıandııada alǵashqy júrgizýshisiz avtobýs iske qosylǵan bolatyn.
