Germanııada jumyssyzdardyń jumys tabý múmkindigi rekordtyq tómen deńgeıge jetti

ASTANA. KAZINFORM —  Bul týraly Web.de onlaın-portalyna bergen suhbatynda Germanııanyń Federaldyq eńbek agenttiginiń basshysy Andrea Nales málimdedi, dep habarlaıdy DW.

— Bizde jumyssyz adamnyń qaıtadan jumys tabý yqtımaldyǵyn kórsetetin ındıkator bar. Ádette bul kórsetkish shamamen jetige teń bolatyn, al qazir — 5,7. Munshalyqty tómen deńgeı buryn-sońdy bolmaǵan, — dep túsindirdi ol.

Áleýmettik tólemderge josparlanyp otyrǵan reformany bazalyq áleýmettik kómek Bürgergeld-ti alyp tastap, járdemaqy alýshylarǵa qoıylatyn talaptardy qatańdatýdy synǵa alǵan Nales, mundaı norma «eger naqty adamnyń biliktilik beıini eskerilmese, problemaly bolýy múmkin» degen pikir bildirdi.

Onyń aıtýynsha, jumyssyzdardyń daǵdylary kóbine bos jumys oryndarynyń talaptaryna saı kelmeıdi, al eger olardyń kásibı daıyndyǵy nazarǵa alynbasa, «úsh aıdan keıin adamdar qaıtadan jumyspen qamtý ortalyǵynyń esigin qaǵatyn bolady».

Jaqsy bilim áli de sheshýshi ról atqarady, alaıda «endi birde-bir top jumysynan aıyrylýdan tolyq saqtandyrylmaǵan» dep atap ótti Nales. Ásirese eńbek jolyn endi bastaǵandar úshin jaǵdaı kúrdeli.

Onyń aıtýynsha, 2025 jyly kásibı oqytýdy bastaǵan jastardyń sany sońǵy 25 jyldaǵy eń tómengi deńgeıge túsken. 

Aıta ketelik Germanııada biraz salada jumys oryndary qysqaratyny týraly jazdyq.