Germanııada jumyssyzdar sany 3 mıllıonǵa jýyqtady
ASTANA. KAZINFORM — Germanııada eńbek naryǵyndaǵy jaǵdaı kúrdeli kúıinde qalyp otyr. Qazan aıynda jumyssyzdar sany azaıǵanyna qaramastan, olardyń jalpy sany 3 mıllıonǵa jýyq deńgeıde saqtaldy, dep habarlaıdy BILD.
Germanııanyń Federaldyq eńbek agenttiginiń málimetinshe, 2026 jylǵy qazanda elde 2 mıllıon 955 myń jumyssyz tirkelgen. Bir aıda olardyń sany 40 myń adamǵa azaıǵanymen, ótken jyldyń sáıkes kezeńimen salystyrǵanda 44 myń adamǵa ósken.
Jumyssyzdyq deńgeıi 6,3 paıyz. Sonymen qatar maýsymdyq faktorlardy eskere otyryp túzetilgen derekter boıynsha jumyssyz azamattardyń sany 4 myń adamǵa artqan.
Federaldyq eńbek agenttiginiń basshysy Andrea Nales eldegi ekonomıkalyq jaǵdaı eńbek naryǵynyń qalpyna kelýine áli de kedergi keltirip otyrǵanyn atap ótti. Onyń aıtýynsha, qazan aıynda jumyssyzdar sanynyń azaıýy mardymsyz bolǵan.
Jumyspen qamtylǵandar sany da tómendep keledi. Qyrkúıek aıynda Germanııada 45,77 mıllıon adam jumys istegen. Bul ótken jyldyń sáıkes kezeńimen salystyrǵanda 211 myń adamǵa az.
Sonymen qatar jumysqa ornalasýǵa arnalǵan bos oryndar sany qysqarǵan. Qazan aıynda jumys berýshiler 654 myń bos jumys ornyn usynǵan. Qyrkúıekpen salystyrǵanda olardyń sany 6 myńǵa azaıdy.
Jumys kúshine suranystyń tómendeýine baılanysty jumyssyzdyq boıynsha saqtandyrý tólemderin alatyn azamattardyń sany artqan. Bir jyl ishinde bul kórsetkish 88 myń adamǵa ósip, 1 mıllıon 65 myńǵa jetti.
Al eńbekke qabiletti, negizgi áleýmettik kómek alatyn azamattardyń sany 172 myń adamǵa qysqaryp, 3 mıllıon 659 myńdy qurady.
Buǵan deıin álemde shamamen 800 mıllıon jas jumyssyz qalý qaýpine tap bolǵany habarlanǵan edi.
Aıta ketelik Germanııa mıgranttarǵa arnalǵan nemis tili emtıhanynyń talaptaryn qatańdatady.
